Ադրբեջանի նախագահի վարչակազմի ղեկավարի տեղակալ Նովրուզ Մամեդովը «Twitter»-ի իր էջում տհաճ կարծիք է հնչեցրել Եվրոպայի խորհրդի գլխավոր քարտուղար Թորնբյորն Յագլանդի հասցեին:
«Յագլանդը, որն իրեն մարդու իրավունքների «թիկնապահ» է համարում, շատ ճարպիկ դիվանագետ է»,- հայտարարել է Մամեդովը:
Նրա խոսքով, Եվրոպայի խորհրդի գլխավոր քարտուղարը համարձակություն է ունեցել ընդամենը մի քանի անգամ խոսել Եվրոպայում ներգաղթյալների եւ փախստականների իրավունքների բազմամյա խախտումների մասին. «Բայց, հազիվ դառնալով Հանձնաժողովի ղեկավար, նա բաց չթողեց Նոբելյան մրցանակաբաշխության նորընտիր նախագահին պարգեւատրելու նախաձեռնությունը: Արդյունքը երկար սպասել չտվեց. նա դարձավ ԵԽ գլխավոր քարտուղար: Կայծակնային արագությամբ կարծիք հայտնելով Ադրբեջանի մասին՝ Յագլանդը, անկասկած, անսահման «հավատարմություն» է ցուցադրում ինչ-որ մեկին»:
Հիշեցնենք, որ Եվրոպայի խորհուրդը հայտարարել է մարդու իրավունքների հարցերով Ադրբեջանի հետ համատեղ խմբից դուրս գալու մասին: Պատճառն այդ երկրում իրավապաշտպանների իրավիճակի կտրուկ վատթարացումն է: Ձերբակալված իրավապաշտպանների թիվն աճում է, իսկ Եվրոպայի խորհուրդը նրանց կալանքի անընդունելի պայմանների մասին անհանգստացնող վկայություններ է ստանում: