Իրանական կողմը հետաքրքրված է Հայաստանի հետ հանքարդյունաբերության, զբոսաշրջության, արդյունաբերության եւ այլ ոլորտներում համագործակցությամբ: Այս մասին, հոկտեմբերի 10-ին Իրանում ՀՀ դեսպան Արտաշես Թումանյանի հետ հանդիպման ժամանակ նշել է Իրանի առեւտրի, արդյունաբերության, հանքերի եւ գյուղատնտեսության պալատի նախագահ Մոհսեն Ջալալփուրին:
ԱԳՆ մամուլի ծառայությունից NEWS.am-ին հայտնում են, որ Մոհսեն Ջալալփուրը կարեւորել է հայ-իրանական երկկողմ տնտեսական հարաբերություների հետագա զարգացումն ու առավել խորացումը:
Դեսպան Թումանյանը կարեւորել է Իրանի առեւտրի պալատի դերը երկու երկրների միջեւ ապրանքաշրջանառության ծավալների մեծացման, փոխադարձ ներդրումային ծրագրերի իրականացման գործում եւ նշել, որ Իրանի միջուկային ծրագրի շուրջ ձեռք բերված համաձայնությունից, ինչպես նաեւ Հայաստանի` ԵՏՄ անդամակցությունից հետո, նոր հնարավորություններ են ստեղծվել առեւտրատնտեսական հարաբերությունների ընդլայնման համար: