Թուրքիայի քրդական «Ժողովուրդների դեմոկրատական» (HDP) կուսակցությունը ժողովրդավարական ձեւով է պատժելու հոկտեմբերի 10-ին Անկարայում տասնյակ մարդկանց կյանք խլած պայթյունների մեղավորներին: NEWS.am-ի թղթակցի հետ զրույցում նման կարծիք հայտնեց կուսակցությունից պատգամավոր ընտրված, ազգությամբ հայ պատգամավոր Կարո Փայլանը:
«Իմ ցանկությունն է, որ մինչեւ խորհրդարանական ընտրությունները բացահայտվի հոկտեմբերի 10-ին տեղի ունեցածը եւ մեղավորները պատժվեն: Մենք վրեժ չենք լուծելու, շարունակելու ենք խաղաղություն քարոզել, իսկ նոյեմբերի 1-ին մենք նրանց կպատժենք ժողովրդավարական ձեւերով: Մենք չենք ցանկանում՝ արյուն թափվի, մենք խաղաղություն ենք ուզում»,- ասաց հայ պատգամավորը:
Թե ով է կանգնած հոկտեմբերի 10-ին տեղի ունեցած արյունալի դեպքերի հետեւում, Կարո Փայլանը չցանկացավ անուններ տալ: Նրա խոսքով՝ ձեռագիրը նույնն է. 2007թ. հունվարին սպանվեց Հրանտ Դինքը, ամիսներ առաջ Սուրուչում նմանատիպ պայթյուն տեղի ունեցավ, մինչդեռ ոչ ոք չպատժվեց. «Իմ նշած եւ ոչ մի դեպքում ուսումնասիրություն չկատարվեց, մեղավորներին չհայտնաբերեցին, չպատժեցին: Իրավապահ մարմինները բոլոր դեպքերում էլ փակում են իրենց աչքերը՝ առանց հետեւանքների մասին մտածելու»:
Հիշեցնենք, որ Թուրքիայի մայրաքաղաք Անկարայում 2015թ. հոկտեմբերի 10-ի առավոտյան արհմիությունների կազմակերպած Խաղաղության հանրահավաքի ժամանակ տեղի են ունեցել հզոր պայթյուններ, որոնց հետեւանքով զոհվել է առնվազն 97, վիրավորվել 246 քաղաքացի: