Բրազիլիայի հարավ-արեւելյան Մինաս-Ժերայս նահանգի բանտերից մեկում խռովության ժամանակ 3 բանտարկյալ է սպանվել: Մի քանի հոգի վիրավոր է, առնվազն 14 բանտարկյալ էլ փախուստի է դիմել: Այս մասին գրում է ՏԱՍՍ-ը՝ վկայակոչելով O Globo հեռուստաալիքին:
Նախնական տվյալներով, սպանվածներն այլ բանտարկյալների զոհ են դարձել:
Ուղղիչ հաստատությունում անկարգությունները սկսվել են վաղ առավոտյան: Խռովության մասնակիցները պահանջել են իրենց այլ բանտ տեղափոխել՝ պատճառաբանելով, թե շատ հեռու են հարազատներից: Ռազմական ոստիկանության միջամտությունից հետո խռովությունը ճնշվել է: Ներկայում իրավապահներն ուղղաթիռներով պարեկում են՝ փախուստի դիմածներին գտնելու համար:
