Սերգեյ Դովլաթովի մասին «Դովլաթովի 5 անկյունները» անվանումով վավերագրական նոր ֆիլմը դժվար է կենսագրական անվանել. այն ավելի շուտ ցուցադրում է Դովլաթովի, նրա գրական գործունեության եւ ապրած ժամանակաշրջանի մասին հեղինակների տեսլականը, ինչպես նաեւ փորձում է պատասխանել հարցին, թե որտեղ էր փոխզիջման այն սահմանը, որին Դովլաթովը պատրաստ էր գնալ՝ ԽՍՀՄ-ում տպագրվելու համար: NEWS.am-ի թղթակցի հետ զրույցում նման կարծիք հայտնեց «Դովլաթովի 5 անկյունները» ֆիլմի ռեժիսոր եւ համահեղինակ Ազա Բաբայանը:
«Մեզ համար կարեւոր էր հասկանալ, թե որտեղ էր փոխզիջման այն սահմանը, որին Դովլաթովը պատրաստ էր գնալ՝ ԽՍՀՄ-ում տպագրվելու, Գրողների միության անդամ լինելու համար, եւ որտեղ էր ավարտվում այդ սահմանը: Ֆիլմն ամենեւին էլ կենսագրական չէ, այն Դովլաթովի, նրա գրական գործունեության եւ ապրած ժամանակաշրջանի մասին մեր տեսլականն է, փորձ՝ հասկանալու, թե ինչու է նա այսօր այդքան հանրահայտ, նաեւ փորձ՝ հասկանալու, թե որն է նրա պատմություններում մտացածինը, իսկ որտեղ՝ կյանքի ճշմարտությունը, որի համար նրան բոլորն այդքան սիրում են»,- ասաց ռեժիսորը:
Այս հարցերից որոշները հեղինակների համար բաց են մնացել, որոշների պատասխաններն էլ հաջողվել է գտնել: Օրինակ, ըստ Ազա Բաբայանի, իրենց համար հասկանալի դարձավ, որ Դովլաթովը գրող է դարձել այն պահին, երբ հասկացել է, որ այլեւս պետք չէ զիջումների գնալ:
Ռեժիսորի խոսքով, ֆիլմի վրա բավական երկար են աշխատել, եղել են ամենուր, որտեղ ապրել է Դովլաթովը. Էստոնիայում, Պետերբուրգում, Պսկովի մարզում, նույնիսկ Չեչնիայում: Նաեւ Ամերիկա են մեկնել, որտեղ եղել են այն փողոցներում ու շենքերում, որտեղ ապրել եւ աշխատել է գրողը: Եվ, իհարկե, մեխ թվով հարցազրույցներ են արել հարեւանների, ընկերների, գործընկերների, կանանց, ընկերուհիների եւ բոլոր նրանց հետ, ովքեր կարող էին նրա մասին որեւէ հետաքրքիր բան պատմել:
«Իրականում Դովլաթովը շատ խորն է՝ չնայած գրում է այնպես, կարծես նստել ու գրել է այն ամենի մասին, ինչ լսել է: Իրականում նրա ստեղծագործություններում մեծ իմաստ կա, մեծ խորություն, եւ ոչ մի ֆիլմ չի կարող բացահայտել Դովլաթովի ամբողջ խորությունը»,- նշեց ռեժիսորը:
Հոկտեմբերի 12-ին Երեւանում կայացավ Ազա Բաբայանի եւ Վադիմ Դուբնովի «Դովլաթովի 5 անկյունները» վավերագրական ֆիլմի փակ ցուցադրությունը: Ժապավենը ստեղծվել է Հայաստանի մշակույթի նախարարության Ազգային կինոկենտրոնի աջակցությամբ: Ցուցադրությանը ներկա էին նաեւ Դովլաթովի կինը՝ Ելենա Դովլաթովան եւ դուստրը՝ Կատերինա Դովլաթովան:
