ԱՄՆ-ն մտադիր է ՄԱԿ-ի Անվտանգության խորհրդում քննարկել Իրանի կողմից բալիստիկ հրթիռի փորձարկման հարցը: Այս մասին հայտարարել է ԱՄՆ պետքարտուղարության պաշտոնական ներկայացուցիչ Մարկ Թոները:
Ավելի վաղ IRNA գործակալությունը, վկայակոչելով Իրանի պաշտպանության նախարար, գեներալ Հոսեյն Դեգհանին, գրել էր կիրակի հեռահար գործողությամբ հրթիռի հաջող փորձնական արձակման մասին: ՌԻԱ Նովոստիի փոխանցմամբ, նախարարը նաեւ հայտարարել է, որ այդ հարցն Իրանի միջուկային ծրագրի շուրջ համաձայնության հետ որեւէ առնչություն չունի:
«Մենք մտադիր ենք այդ միջադեպը քննարկել ՄԱԿ-ի ԱԽ-ում»,- հայտարարել է Թոները՝ հավելելով, որ Իրանը վերջին տարիներին «մշտապես անտեսում է ՄԱԿ-ի Անվտանգության խորհրդի բանաձեւերը», ինչը «խորապես անհանգստացնում է ԱՄՆ-ին»:
Երեքշաբթի Սպիտակ տան ներկայացուցիչ Ջոշ Էռնեստը հայտարարել էր, որ ԱՄՆ-ն «համոզիչ փաստարկներ» ունի Իրանի հրթիռային գործունեության վերաբերյալ ՄԱԿ-ի ԱԽ-ի բանաձեւի խախտման մասին:
