![](img/news/29/07/61/default.jpg)
ԵՏՄ-ն աներկբայորեն նոր հնարավորություններ է բացել, սակայն հստակ չէ՝ Հայաստանը հիմա ԵՏՄ ներսում է, թե դրսում՝ կապված տնտեսության մեջ գործընթացների ու ընթացակարգերի ներդաշնակեցման հետ: Այս մասին, այսօր՝ հոկտեմբերի 14-ին, ԵՄ-ի եւ ՎԶԵԲ-ի կողմից տեղական փոքր եւ միջին ձեռնարկությունների աջակցությանն ուղղված ծրագրերին նվիրված քննարկման ժաանակ նշեց Հայաստանում Վերակառուցման եւ զարգացման եվրոպական բանկի գրասենյակի ղեկավար Մարկ Դեւիսը՝ անդրադառնալով դիտարկմանը, որ Հայաստանն արդեն 10 ամիս է ԵՏՄ անդամ է, սակայն տնտեսական արդյունքները բավական անբարենպաստ են:
Նրա խոսքով, ԵՏՄ-ում ֆինանսական սեկտորի, գազի ու նավթի ոլորտների միասնականացման համար մինչեւ 25 տարի է նախատեսված, ինչը հաշվի առնելով, պարզ է, որ հիմա արդյուքններ տեսանելի չեն լինի: «Որտեղի՞ց կարող ենք արդյունք տեսնել, եթե դեռ 25 տարի պիտի իրականացվեն այդ փոփոխությունները։ Բայց օրինակ գյուղմթերքի արտահանման, տեքստիլ արդյունաբերության ոլորտներում հնարավորություններ բացվում են, որոնք նկատելի են: Ես լավատես եմ տրամադրված»,-ասաց նա՝ հավելելով, որ շատ կարեւոր է, թե ԵՏՄ-ն որքան արագ կկարողանա լուծել տարանցիկ աապրանքաշրջանառոության խնդիրները։
Նույն խնդրի առնչությամբ, Հայաստանում ԵՄ պատվիրակության միջազգային օգնության եւ համագործակցության գրասենյակի ղեկավար Լուդովիկ Չեխանովսկին նշեց. «Մեր տեսանկյունն այն է, որ շուտ է խոսել արդյունքների մասին։ Պետք է տարբերակում մտցնել երկարաժամկետ ու կարճաժամկետ արդյունքների միջեւ։ ԵՏՄ-ն երկարաժամկետ արդյունքի ակնկալիք կարող է տալ: Բացի այդ տարածաշրջանում արժույթներն արժեզրկվում են, ռեցեսիայի մեջ է տարածաշրջանը, որն ազդում է Հայաստանի վրա, ինչը սակայն ԵՏՄ-ի հետ կապ չունի»: