Սիրիայում անվտանգ կամ անօդաչու գոտիների ստեղծման հարցը պետք է լուծվի ՄԱԿ-ի մակարդակով: Այս մասին հայտնել է Եվրահանձնաժողովի ղեկավարի տեղակալ Ֆրանս Թիմերմանսը:
«Այս հարցը Եվրահանձնաժողովի իրավասության շրջանակում չէ: Այն պետք է լուծվի ՄԱԿ-ի մակարդակով ու քննարկվի Եվրամիության անդամ երկրների հետ»,- հայտարարել է նա՝ հոկտեմբերի 15-16-ին ծրագրվող Եվրամիության գագաթաժողովի նախաշեմին:
Գագաթաժողովում Եվրահանձնաժողովը կներկայացնի միգրացիոն ճգնաժամի դեմ պայքարի վերաբերյալ իր առաջարկները, որոնք ներառում են՝ Սիրիայում իրավիճակի կարգավորման, ինչպես նաեւ սիրիական փախստականների տեղավորման հարցերով Թուրքիայի հետ համագործակցության ընդլայնումը: Գագաթաժողովում նաեւ քննարկվելու են Սիրիայում քաղաքական երկխոսության սկիզբն ապահովելու հարցերը, հայտնում է ՏԱՍՍ-ը: