Մեքքայի մոտ՝ Մինայի հարթավայրում, սեպտեմբերի 24-ին տեղի ունեցած հրմշտոցի զոհերի թիվը հասել է 1633-ի։ Այս մասին գրում է «Ալ Վասատ» թերթը՝ վկայակոչելով 31 պետությունների տրամադրած տվյալները։
Սաուդյան Արաբիայի իշխանությունները սեպտեմբերի 26-ից հետո նոր պաշտոնական տվյալներ չեն հաղորդել։ Երկրի Առողջապահության նախարարության տեղեկություններով՝ զոհվել է 769 մարդ, վիրավորվել 863-ը։
Այս տարի հաջին մասնակցել են ավելի քան 100 երկրներից ժամանած ուխտավորներ։ Զոհերի շրջանում հատկապես մեծ է իրանցիների թիվը՝ 465 մարդ, հայտնում է «ՌԻԱ Նովոստի»-ն։
Մինայի հարթավայրում այս տարի ուխտավորների կուտակումներից առաջացած հրմշտոցներից զոհվել է ռեկորդային թվով մարդ։ Վերջին անգամ նման խոշոր թիվ էր գրանցվել 1990թ., երբ Մինայի հարթավայրում զոհվել էր 1426 ուխտավոր։