Մոսկվայում սպանված՝ բժշկական համալսարանի 19-ամյա ուսանողուհի Աննա Սարգսյանը Ռուսաստանի քաղաքացի է։ Ինչպես NEWS.am-ին հայտնել են Ռուսաստանում Հայաստանի դեսպանատնից, աղջիկը ծնվել է Մոսկվայում։
Քննչական մարմինները շարունակում են հետաքննել սպանության հանգամանքները։ Նշենք, որ Ն.Ի. Պիրոգովի անվան բժշկական համալսարանի ուսանողուհին սպանվել էր Խաչատրյան եւ Օտրադնայա փողոցների խաչմերուկում։ Գլխավոր կասկածյալը Էմիլ Զուլֆուղարով անունով 19-ամյա մի ադրբեջանցի է, որն անպատասխան սիրահարված էր զոհին։
Աղջկա կյանքի վերջին վայրկյանները ֆիքսել է փողոցում տեղադրված տեսախցիկը։ Կադրում երեւում է, թե ինչպես է տղան մի քանի անգամ հարվածում աղջկա որովայնին եւ դիմում փախուստի։ Արյունաշաղախ աղջիկը վայր է ընկնում ասֆալտին եւ մահանում նախքան շտապ օգնության ժամանելը։
Աղջկա հայրը նշել է, որ բազմիցս ոստիկանություն դիմում է գրել, սակայն իրավապահները անուշադրության են մատնել բողոքը։