ՀՀ քննչական կոմիտեի Երեւան քաղաքի Էրեբունի եւ Նուբարաշեն վարչական շրջանների քննչական բաժնում քննվող քրեական գործով միջոցներ են ձեռնարկվում՝ պարզելու փողոցում քաղաքացուն կողոպտած անձանց ինքնությունը:
Դեպքը տեղի է ունեցել 2015թ. մայիսի 25-ին՝ ժամը 23:45-ի սահմաններում. առերեւույթ հանցագործություն կատարած անձինք Երեւան քաղաքի Ազատամարտիկների փողոցի 78/1 շենքի հարակից տարածքում քաղաքացու ձեռքից բացահայտ հափշտակել են նրա դրամապանակը, որի մեջ եղել է կանխիկ գումար, բանկային պլաստիկ քարտ, անձնագիր եւ տան բանալիներ՝ պատճառելով զգալի չափերի գույքային վնաս:
Դեպքի առթիվ հարուցվել է քրեական գործ՝ ՀՀ քրեական օրենսգրքի 176-րդ հոդվածի 2-րդ մասի 1-ին կետով:
Նախաքննության ընթացքում ստացվել է դեպքի վայրում տեղադրված տեսախցիկների՝ տվյալ օրվա տեսաձայնագրույթունը, որտեղ երեւում է վազող երկու երիտասարդ:
Քրեական գործով բազմակողմանի, օբյեկտիվ եւ լրիվ նախաքննության իրականացումն ապահովելու համար միջոցներ են ձեռնարկվում՝ տեսագրությունում պատկերված անձանց հայտնաբերելու ուղղությամբ։
Ովքեր ճանաչում են տեսագրությունում երեւացող անձանց կամ որեւէ տեղեկություն ունեն նրանց ինքնության կամ գտնվելու վայրի մասին, խնդրում են հայտնել ՀՀ քննչական կոմիտեի Երեւան քաղաքի քննչական վարչության Էրեբունի եւ Նուբարաշեն վարչական շրջանների քննչական բաժին կամ ոստիկանության մոտակա բաժին:
