![](img/news/29/08/76/default.jpg)
Սիրիայի ԱԳՆ-ն ՄԱԿ-ին տեղեկացրել է, որ Կրեմլի կողմից Դամասկոսին տրամադրվող ռազմական օգնությունն ամբողջությամբ համապատասխանում է միջազգային իրավունքի նորմերին եւ ՄԱԿ-ի կանոնադրությանը: Այս մասին գրում է ՌԻԱ Նովոստին՝ վկայակոչելով SANA գործակալությանը:
Հաղորդագրության համաձայն, Դամասկոսը միջազգային հանրությանը բազմիցս առաջարկել է համագործակցել ահաբեկիչների դեմ պայքարում, բայց այդ կոչերն ուշադրության չեն արժանացել:
ԱԳՆ-ն հայտարարել է, որ Սիրիան խորը երախտագիտություն է հայտնում Ռուսաստանին՝ ահաբեկչության դեմ պայքարի փորձերի համար: Սիրիական արտաքին քաղաքական գերատեսչության կարծիքով, Մոսկվայի գործողությունները պետք է օրինակ հանդիսանան այլ պետությունների համար:
2011 թվականի մարտից Սիրիայում զինված հակամարտություն է ընթանում, որի հետեւանքով, ՄԱԿ-ի տվյալների համաձայն, ավելի քան 250 հազար մարդ է զոհվել: Կառավարական զորքերին դիմակայում են զինված տարբեր կազմավորումների պատկանող զինյալ ջոկատներ: Առավել ակտիվ են «Իսլամական պետություն» եւ «Ջեհաթ ան-Նուսրա» ծայրահեղական խմբավորումները:
Սիրիայի նախագահի Բաշար Ասադի խնդրանքով, սեպտեմբերի 30-ից Ռուսաստանը սկսել է թիրախավորած ավիահարվածներ հասցնել այդ երկրում «Իսլամական պետության» օբյեկտների ուղղությամբ: Այս ընթացքում ռուսական ավիացիոն ուժերն ավելի քան 450 հարված են հասցրել՝ ոչնչացնելով շուրջ 300 զինյալի, ուսումնամարզական ճամբարներ, հրամանատարական կետեր, զինամթերքի պահեստներ եւ այլ օբյեկտներ: