Ավետիսյանների սպանության մեջ մեղադրվող, ռուսական 102-րդ ռազմաբազայի զինծառայող Վալերի Պերմյակովը մտել է Ավետիսյանների տուն, քանի որ երկար փնտրելուց հետո առաջին բաց դարպասն է գտել: Այս մասին այսօր՝ հոկտեմբերի 16-ին, լրագրողների հետ հանդիպմանն ասաց տուժողի իրավահաջորդի ներկայացուցիչ Երվանդ Վարոսյանը՝ նշելով, որ այսպիսի ցուցմունք է տվել Պերմյակովը:
«Պերմյակովն իր ցուցմունքում նկարագրել է, որ փորձել է թակել դուռը, բայց արձագանք չի եղել, կարծել է, որ տանը մարդ չկա, բայց զենքը լիցքավորել է, որ եթե տանը մարդիկ լինեին, որոնք կխոչընդոտեին իրեն հագուստ, գումար հայթայթելու հարցում, սպանելու էր»,- ասաց Երվանդ Վարոսյանը:
Պերմյակովն իր ցուցմունքում պատմել է, որ տուն մտնելուց հետո ջուր է խմել, ապա մտել առաջին սենյակը, եւ երբ իր գլխին ամրացված լապտերի լույսն ընկել է քնած Ավետիսյանների դստեր վրա, վերջինս զարթնել է եւ սկսել աղմկել:
«Պերմյակովի խոսքով՝ ինքն անմիջապես իրեն կորցրել է, կրակոցներ է արձակել, բոլորն արթնացել են, եւ ինքն անցնելով սենյակներով՝ բոլորին սպանել է: Վերջին սենյակի հետ կապված տարօրինակություններ կան ցուցմունքում: Մենք գիտենք, որ փոքրիկ աղջնակին սպանել են հրազենից: Իսկ Պերմյակովը պատմել է, թե մեկ կրակել է, մեկ սվինով է հարվածել: Ցուցմունքում ասել է նաեւ՝ ներվերիս վրա ազդել են»,- ասաց Երվանդ Վարոսյանը:
Նշենք, որ փաստաբաններն այսօր ներկայացրել են դատահոգեբանական-դատահոգեբուժական փորձաքննության եզրակացությունները:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով: