Սահմանադրական փոփոխությունների նախագծի գրքույկները իշխանությունը չի բաժանում քաղաքացիներին, քանի որ հաշվարկել է՝ քաղաքացիների փոքր տոկոսն է հետաքրքրված սահմանադրական փոփոխությունների նախագծի բովանդակությամբ։ Այս մասին NEWS.am-ի հետ զրույցում հայտարարեց ՀՀԿ խմբակցության պատգամավոր Սուքիաս Ավետիսյանը՝ արձագանքելով ընդդիմադիրների այն մեղադրանքներին, որ իշխանությունը սահմանադրական փոփոխությունների նախագիծը չի բաժանել քաղաքացիներին, մինչդեռ 1995 եւ 2005 թվականներին սահմանադրական փոփոխությունների գրքույկները բաժանվել են 500 հազար եւ 15 հազար օրինակ։
«Եկեք հասկանանք՝ ինչ է նշանակում բաժանել: Մեր «Այո»-ի շտաբում կան փաստաթղթերը, գրքույկները։ Ես ճիշտ չեմ համարում՝ դուրս գամ փողոցներում նախագիծ բաժանեմ, որովհետեւ շատ հաճախ մենք հանդիպում ենք այնպիսի մի երեւույթի, որ փողոցում բաժանում են, բայց մի քանի րոպե հետո տեսնում ես, որ փողոցում բուկլետները թափված են։ Մենք էդ մշակույթը դեռեւս չունենք, որ ում որ պետք է, որ կարդա, վերցնի, ում որ պետք չի՝ չվերցնի»,-ասաց իշխանության ներկայացուցիչը։
Հարցին, թե դա ոչ արդյունավետ ծա՞խս են համարում, նա պատասխանեց․ «Անիմաստ ծախս չէի ասի, բայց գիտեք ինչ կա, հիմա որ վերցնենք 500 հազար օրինակ բաժանենք, իսկ փաստը ցույց է տալիս, որ քաղաքացիների շատ քիչ տոկոսն է հետաքրքրված փաստաթղթով, այսինքն՝ եթե մարդիկ հետաքրքրված չեն, ուրեմն հետաքրքրված չեն էդ փաստաթուղթը վերցնելով։ Ինչքանո՞վ է հաճելի, որ մարդը կարող է էդ փաստաթուղթը վերցնի, որ փողոցում են իրեն բաժանել, հետո տանի գցի՝ առանց գիտակցելու, որ դա երկրի մայր օրենքն է, ու պետք չի, որ գցի աղբարկղ»։
Սուքիաս Ավետիսյանը հորդորեց նախագծի բովանդակությամբ հետաքրքրված քաղաքացիներին փաստաթուղթը վերցնել «Այո»-ի շտաբներից։
Դիտարկմանը, թե քաղաքացիների՝ նախագծին չծանոթանալը «Այո»-ի՞, թե՞ «Ոչ»-ի օգտին է, Ավետիսյանը վստահեցրեց․ «Մենք ամեն ինչ անում ենք, որ քաղաքացիները բովանդակության հետ ծանոթ լինեն, որովհետեւ, ցավոք սրտի, մեր հակառակորդները, «Ոչ»-ի կողմնակիցները ամեն ինչ անում են, որ տեքստին ծանոթ չլինեն, որովհետեւ իրենք մի բան են ասում՝ սա իշխանության վերարտադրություն է, ու քանի որ իշխանությունն է ներկայացրել, գնացեք «ոչ» ասեք։ Եթե քաղաքացուն սահմանադրության նախագիծը հասանելի չէ, դա ցավոք սրտի, «Ոչ»-ի օգտին է»,-եզրակացրեց իշխանական պատգամավորը։