Եթե Սահմանադրական փոփոխություններն ընդունվեն, հայերը կզրկվեն Հանրապետության նախագահ, քաղաքապետ կամ գյուղապետ ընտրելու իրավունքից: Այսօր՝ նոյեմբերի 24-ին, Արարատի մարզի Վերին Արտաշատ գյուղում «Այո»-ի եւ «Ոչ»-ի ռեալիթի շոուի շրջանակում հավաքվածների հետ զրույցում նման կարծիք է հայտնել քաղաքացիական ակտիվիստ Վաղինակ Շուշանյանը, որը դեմ է Սահմանադրական փոփոխություններին:
«Գործող Սահմանադրությամբ մենք ունենք ընտրելու հինգ իրավունք: Նոր Սահմանադրությունը զրկում է մեզ ընտրելու 2 իրավունքից. մենք ընտրում ենք համայնքի ավագանի, որն ընտրում է համայնքի ղեկավարին, մենք ընտրում ենք ԱԺ, որն ընտրում է երկրի նախագահին»,- ասել է նա:
Վաղինակ Շուշանյանի կարծիքով՝ Սահմանադրության նոր նախագծի թերություններից է այն, որ անկուսակցական անձինք չեն կարող առաջադրվել խորհրդարանական ընտրություններում:
«Առաջարկվում է անցում կատարել համամասնական ընտրակարգին, ինչը նշանակում է՝ անհատներն այլեւս հնարավորություն չեն ունենա առաջադրվելու խորհրդարանական ընտրություններին: Օրինակ, անհատը խելացի է, կարող է դրական փոփոխություններ կատարել իր համայնքում կամ մարզում, սակայն անկուսակցական է, հետեւաբար, չի կարող առաջադրվել»,- նշել է Վաղինակ Շուշանյանը՝ հորդորելով դեմ քվեարկել Սահմանադրական փոփոխություններին:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին:
