Իշխանության մեջ էլ կան մարդիկ, որոնք դեմ են Սահմանադրական փոփոխություններին: Այս մասին այսօր՝ նոյեմբերի 24-ին, «Այո»-ի եւ «Ոչ»-ի ռեալիթի շոուի շրջանակում Արարատի մարզի Վերին Արտաշատ գյուղում հավաքվածներին ասել է Սահմանադրական բարեփոխումների մասնագիտական հանձնաժողովի անդամ Հրայր Թովմասյանը՝ նշելով, որ այս փոփոխությունները չպետք է դիտարկել որպես իշխանություն-ընդդիմություն պայքար:
«ՀՅԴ-ն կողմ է Սահմանադրական փոփոխություններին, Ալիկ Արզումանյանը, Ռուբիկ Հակոբյանը՝ նույնպես, հիմա ի՞նչ, իրենք իշխանության ընդդիմությո՞ւն են: Ոչ, մարդիկ կողմ են Սահմանադրական փոփոխություններին, որովհետեւ սա առաջընթաց է նաեւ ընդդիմության համար»,- ասել է Հրայր Թովմասյանը:
Մասնագիտական հանձնաժողովի անդամի կարծիքով՝ ներկայումս չկա որեւէ չափորոշիչ՝ գնահատելու ընդդիմության կատարած աշխատանքը: Մինչդեռ Սահմանադրական փոփոխությունների ընդունումից հետո կարելի է գնահատել այդ աշխատանքը:
«Օրինակ, եթե ընդդիմությունն ասի, որ իշխանությունը թալանել է, ես կասեմ՝ որպես ընդդիմություն, ինչո՞ւ չեք բռնել իշխանության ձեռքը: Իսկ ներկայիս Սահմանադրությամբ ընդդիմությունը կարող է միայն գոռալ»,- նշել է նա:
Հիշեցնենք, որ Սահմանադրական փոփոխությունների հանրաքվեն տեղի կունենա դեկտեմբերի վեցին:
