![](img/news/29/80/34/default.jpg)
Փարիզի «Բատակլան» թատրոնի համերգասրահը գրաված ահաբեկիչները կարող էին լինել թմրանյութի ազդեցության տակ, գրում է Times թերթը՝ վկայակոչելով ոստիկանության սպային, որը նրանց հետ բանակցություններ էր վարում։
Ոստիկանների խոսքով՝ ահաբեկիչները շփոթված տեսք ունեին եւ փորձում էին իրավապահներին համոզել իրենց թույլ տալ փախչել։ Ոստիկան Ժորժ Սալինասն ասել է, որ երբ ստորաբաժանումը փորձել է մտնել սրահ, կենդանի մնացած 2 հանցագործ 20 պատանդների հետ թաքնվել էին միջանցքում։ «Նրանց գլխում միայն այն էր, թե ինչպես դուրս գալ այդտեղից»,- ասել է Սալինասը։
Ոստիկաններից մեկը, որը ներկայացել է Պասկալ անունով, նրանց հետ հեռախոսով բանակցություններ է վարել։
«Նրանք շատ հուզված էին եւ ցաքուցրիվ մտքեր էին հայտնում, ասես թե թմրանյութի ազդեցության տակ լինեին»,- ասել է նա։
Նշվում է, որ ԻՊ որոշ զինյալները օգտագործում են «կապտագոն» տեսակի թմրանյութ, փոխանցում է Gazeta-ն։