Հայաստանցիների 55,8 տոկոսը վստահ է, որ ընտրություններն ամբողջովին կեղծվում են: Այս մասին, այսօր՝ նոյեմբերի 24-ին, լրագրողների հետ հանդիպման ժամանակ նշել են «APR Group» հասարակական կազմակերպության ներկայացուցիչները, որոնք ներկայացրել են իրենց կազմակերպության անցկացրած հարցման արդյունքները:

Նշենք, որ հարցումն անցկացվել է Երեւանում եւ մարզերում 1300 բնակիչների շրջանում, որով փորձել են պարզել հասարակության վերաբերմունքը տնտեսական եւ սահմանադրությանը վերաբերող հարցերում:

Հարցման արդյունքներով, սահմանադրական գործընթացին տեղյակ է քաղաքացիների 80 տոկոսը, անտեղյակ՝ 20 տոկոսը: «Ըստ մեր հարցման՝ մարդկանց 64,4 տոկոսը կմասնակցի քվեարկությանը, 31,3-ը՝ ոչ, մնացածը՝ դեռ չեն կողմնորոշվել»,-նշել է «APR Group» ՀԿ սոցիոլոգ Լիանա Բալյանը։

Հարցին, թե եթե հանրաքվեն առաջիկա կիրակի լիներ, ինչպե՞ս կքվեարկեիք, հարցման մասնակիցների 35,8 տոկոսը նշել է, որ կողմ քվեարկի, 31,8 տոկոսը՝ դեմ, իսկ ավելի քան 12 տոկոսը նշել է, որ քվեաթերթիկն անվավեր կդարձնի։

Այդուհանդերձ, հարցման մասնակիցների 71,1 տոկոսը վստահ է, որ սահմանադրության փոփոխությունը կընդունվի:

«Հարցվածների 55,8 տոկոսը նշել է, որ ընտրություններն ամբողջովին կեղծվում են։ Մի փոքր մասը վստահում է արդար ընտրությունների անցկացմանը, մյուսներն էլ՝ անտարբեր են»,-ընդգծել է «APR Group» ՀԿ նախագահ Ռուբեն Սարգսյանը։