Ղազախստանը Եվրասիական տնտեսական միության (ԵԱՏՄ) եւ հաջողված ինտեգրացիոն միավորումների, մասնավորապես` Եվրամիության (ԵՄ) միջեւ առեւտրա-տնտեսական փոխգործակցության կողմնակից է, ասել է Ղազախստանի փոխարտգործնախարար Ալեքսեյ Վոլկովը:
«Որպես ԵԱՏՄ-ի ակտիվ մասնակից, Ղազախստանը հետաքրքրված է աշխարհի հաջող ինտեգրացիոն միավորումների եւ տեխնոլոգիապես զարգացած առանձին պետությունների հետ մերձեցմամբ: Դրանից ելնելով` շատ հեռանկարային կլիներ Եվրամիության հետ առեւտրա-տնտեսական փոխգործակցության հաստատումը, ինչը հատկապես կարեւոր է ներկա պայմաններում, այն բարդությունների լույսի ներքո, որ ապրում է համաշխարհային տնտեսությունը», — ասել է Ղազախստանի փոխարտգործնախարարը Sputnik-ին տված հարցազրույցում:
Նրա կարծիքով, հզոր տնտեսական ներուժ ունեցող երկու ինտեգրացիոն միավորման համագործակցության համար առկա են բոլոր անհրաժեշտ նախադրյալները` տնտեսությունների փոխլրացման կարողությունը, աշխարհագրական մերձությունը, առեւտրի միասնական կանոններին հավատարմությունը:
Ինչպես ենթադրում է ղազախ դիվանագետը, նման համագործակցության շրջանակում տարբեր գլոբալ նախագծեր կարող են իրականացվել, մասնավորապես «Մետաքսի ճանապարհի տնտեսական գոտի» նախագիծը, «որոնք կարող են ԵԱՏՄ-ի եւ ԵՄ-ի հետագա տնտեսական զարգացման եւ համաշխարհային տնտեսության առկա դժվարությունները հաղթահարելու հզոր ազդակ հաղորդել»:
Վոլկովը նշել է, որ ԵԱՏՄ-ի ստեղծման ժամանակ նրա հիմնադիրները կողմնորոշվել են ԵՄ-ի կազմավորման փորձով:
