ՀՀ հատուկ քննչական ծառայությունում նյութերի նախապատրաստման ընթացքում պարզվել է, որ 2015 թվականի օգոստոսի 29-ին՝ ժամը 15:15-ին, ոստիկանության Բյուրեղավանի բաժնում ահազանգ է ստացվել այն մասին, որ քաղաքացի Սիմոն Դ.-ն վիճաբանում է ընտանիքի անդամների հետ:
ՀՔԾ-ից NEWS.am-ին հայտնում են, որ ահազանգի կապակցությամբ դեպքի վայր մեկնած ոստիկանության հիշյալ բաժնի աշխատակիցներին տեսնելով, Սիմոն Դ.-ն չի կատարել նրանց օրինական պահանջները եւ բռնություն է կիրառել ոստիկանության ծառայողների նկատմամբ:
Փաստի առթիվ ՀՀ քննչական կոմիտեում հարուցված քրեական գործի նախաքննության ընթացքում ոստիկանության հիշյալ աշխատակիցների նկատմամբ բռնություն գործադրելու համար Սիմոն Դ.-ին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով:
Իշխանության ներկայացուցչի նկատմամբ բռնություն կիրառելու մեջ մեղադրվող Սիմոն Դ.-ն էլ, իր հերթին, հաղորդում է տվել այն մասին, որ հիշյալ օրը տան անդամների հետ վիճաբանելու կապակցությամբ քրոջ՝ Ա. Ս.-ի ահազանգի հիման վրա իրենց տուն այցելած ՀՀ ոստիկանության Կոտայքի մարզային վարչության Բյուրեղավանի բաժնի ծառայողները բռնություն են կիրառել իր նկատմամբ, ինչի հետեւանքով ուշագնաց է եղել:
Սիմոն Դ.-ի հաղորդման հիման վրա՝ բռնություն գործադրելով զուգորդված պաշտոնեական լիազորություններն անցնելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 309-րդ հոդվածի 2-րդ մասով հարուցվել է քրեական գործ:
Կատարվում է նախաքննություն:
