Ազգային ժողովի ՀՀԿ խմբակցության պատգամավոր Սամվել Նիկոյանն ընդունում է, որ Հայաստանում իշխանությունը գերկենտրոնացված է, իսկ կարեւորագույն որոշումներն ընդունվում են Մելիք-Ադամյանում:
Այսօր՝ նոյեմբերի 26-ին, լրագրողների հետ հանդիպմանը ՀՀԿ-ական պատգամավորն ընդգծեց, որ իշխանության գերկենտրոնացումը կապված է գործող Սահմանադրության հետ:
«Բոլոր քաղաքական ուժերը մեզնից պահանջում էին կառավարման խորհրդարանական համակարգ եւ անցում հարյուր տոկոսանոց ընտրական համակարգին, իսկ մենք դիմադրում էինք: Սակայն այժմ մենք հասկանում ենք, որ քաղաքական դաշտի եւ ընդդիմության պահանջը հանրային է, եւ հետեւաբար, անում ենք այն, ինչ պահանջում են իրենք»,- ասաց Սամվել Նիկոյանը:
ՀՀԿ-ական պատգամավորի խոսքով՝ իրենք գիտակցում են, որ կուսակցապետության տարրեր կան, հետեւաբար փորձում են այս հարցը լուծել:
«Ժառանգություն» կուսակցության փոխնախագահ Արմեն Մարտիրոսյանն էլ իր հերթին նշեց, որ իրենք կողմ են խորհրդարանական համակարգին, բայց ոչ միակուսակցական համակարգին:
«Սրանք տարբեր բաներ են: Այստեղ խնդիր է առաջացել. մենք այսօր մի իրավիճակում ենք, երբ միակուսակցական երկրում ենք ապրում: Նոր Սահմանադրությամբ էլ օրինականացվում է միակուսակցական համակարգը»,- նշեց նա:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին: