Լիբանանի Շամա զորավանում տեղակայված UNIFIL-ի (The United Nations Interim Force in Lebanon) խաղաղապահ առաքելության արևմտյան բաժնի կենտրոնակայանում նոյեմբերի 25-ին տեղի է ունեցել հայկական զորախմբի հերթափոխի ավարտման պաշտոնական հանդիսությունը: Այս մասին հայտնում է ՀՀ ԱԳՆ մամուլի, տեղեկատվության և հասարակայնության հետ կապի վարչությունը:
Ծառայության ավարտից հետո, ԱԳՆ-ի փոխանցմամբ, հայ խաղաղապահների 2-րդ զորախումբը լիազորությունները փոխանցել է Շամա ժամանած հաջորդ՝ 3-րդ զորախմբին: Միջոցառմանը ելույթներով հանդես են եկել Լիբանանում ՀՀ դեսպան Աշոտ Քոչարյանը, 2-րդ զորախմբի հրամանատար մայոր Վահան Ավագյանը, կենտրոնակայանի հրամանատար՝ բրիգադի գեներալ Ֆրանկո Ֆեդերիչին, որը շնորհակալության հայտնել հայ խաղաղապահներին իրենց առաքելությունը բարձր մակարդակով իրականացնելու համար:
«Հայաստանի ներգրավվածությունը միջազգային խաղաղապահության ոլորտում աստիճանաբար ընդլայնվում է թե՛ աշխարհագրության, թե՛ քանակական և թե՛ որակական իմաստով: Հայաստանը միջազգային խաղաղապահության և անվտանգության ակտիվ ներդրող է հանդիսանում` կուտակելով զգալի փորձ»,- իր ելույթում նշել է դեսպան Աշոտ Քոչարյանը:
Դեսպանը նաեւ բարձր է գնահատել միջազգային կազմակերպությունների և երկրների, մասնավորապես, Իտալիայի դերակատարությունը Հայաստանի խաղաղապահ կարողությունների ստեղծման և զարգացման գործում:
Պաշտոնական հանդիսությունը եզրափակվել է հայ խաղաղապահների 2-րդ զորախմբի զինծառայողների պարգևատրմամբ, որոնց հանձնվել են ՄԱԿ-ի հատուկ մեդալներ` առաքելությունը հաջող ավարտելու համար:
Միջոցառմանը ներկա էին Լիբանանի զինված ուժերի ներկայացուցիչը, զորավանի սպայական անձնակազմը, մի շարք երկրների խաղաղապահներ:
