NEWS.am-ի տեղեկություններով՝ Պոլսո հայոց պատրիարքարանը մի քանի օր է՝ ժողով է անցկացնում, որոշելու Աղթամարի Սուրբ Խաչ եկեղեցում մատուցվելիք պատարագին մասնակցել-չմասնակցելու հարցը: Այդ հարցը հրատապ է դարձել այն բանից հետո, երբ թուրքական իշխանությունները հայտարարեցին, որ պատարագի մատուցումը տեղի է ունենալու առանց եկեղեցու գմբեթին խաչ տեղադրելու: Պատիրարքարանի մեր աղբյուրները հաղորդում են, որ քննարկումներն ընթանում են լարված մթնոլորտում, սակայն հոգեւոր խորհուրդը այդպես էլ ընդհանուր հայտարարի չի գալիս, քանի որ խնդիրը շատ նուրբ է եւ որոշումը պետք է լինի չափազանց հավասարակշռված: Ակնկալվում է, որ առաջիկա երկու օրերին Պոլսո հայ հոգեւոր կենտրոնը կկայացնի համապատասխան որոշումը:
Նշենք, որ Մայր Աթոռ Սուրբ Էջմիածինը հրաժարվել է մասնակցել նշված պատարագին: «Նկատի առնելով խաչի տեղադրման վերաբերյալ արված հավաստիացումների դրժումը, Մայր Աթոռ Սուրբ Էջմիածինը, որն ընդառաջ Կոստանդնուպոլսի Հայոց Պատրիարքության խնդրանքին, սրբազան Պատարագին մասնակցություն պիտի բերեր երկու ներկայացուցիչներով, առկախում է նրանց մասնակցությունը սեպտեմբեր 19-ին Աղթամարի Սուրբ Խաչ եկեղեցում մատուցվող սրբազան Պատարագի արարողությանը»,-ասված է երկու օր առաջ Մայր Աթոռի տարածած հաղորդագրության մեջ:
Ավելի վաղ՝պատարագին չմասնակցելու որոշում էր կայացրել նաեւ Մեծի Տանն Կիլիկիո կաթողիկոսությունը, համարելով, որ դրանով «հստակ կեցվածք է որդեգրում Թուրքիայի ուրացման ու ժխտումի հետեւողական քաղաքականության, հայկական կյանքում շփոթ ստեղծելու եւ միջազգային համայնքին՝ իբրեւ մարդու իրավունքների պաշտպան ներկայանալու Թուրքիայի փորձերի դեմ»:
Հիշեցնենք, որ 2007-ին վերանորոգված եւ որպես թանգարան գործող Աղթամար կղզու Ս. Խաչ եկեղեցին Վանի նահանգապետի եւ Պոլսո հայոց պատրիարքարանի նախաձեռնությամբ, այս տարվա սեպտեմբերի 19-ին կրկին կվերաբացվի կրոնական արարողությունների համար: Թուրքական իշխանությունները, սակայն, հայտարարել են, որ մինչեւ սեպտեմբերի 19-ը տեխնիկական պատճառներով չեն հասցնի Աղթամարի Ս. Խաչի գմբեթին Խաչը տեղադրել եւ այն կմնա պատարագից հետո:
