![](img/news/03/00/90/default.jpg)
Եթե որեւէ եկեղեցու գմբեթին խաչ տեղադրված չէ, ապա այն եկեղեցի անվանել չի կարելի, այն ընդամենը թանգարան է: Այս մասին սեպտեմբերի 7-ին լրագրողների հետ հանդիպման ժամանակ հայտարարեց ԱԺ ՀՀԿ խմբակցության պատգամավոր Մկրտիչ Մինասյանը՝ անդրադառնալով Աղթամարի Սուրբ Խաչ եկեղեցուն, որի գմբեթին խաչ չի տեղադրվելու սեպտեմբերի 19-ին մատուցվելիք պատարագի ժամանակ: Ըստ պատգամավորի՝ հայկական կողմը «չպետք է ջուր լցնի թուրքական շոուի ջրաղացին», քանի որ թուրքերը պատարագ մատուցելու թույլտվություն տալով փորձում են աշխարհին ցույց տալ, որ ժողովրդավար են: «Իսկ մենք այսպիսով պիտի ցույց տանք աշխարհին, որ կան ճշմարտություններ, որոնք պետք է ընդունել: Իսկ կիսաճշմարտություններով, կիսատ քայլերով աշխարհին ներկայանալ որպես ժողովրդավար երկիր՝ ճիշտ չէ»,-նշեց պատգամավորը: Ինչ վերաբերում է Պոլսո Հայոց պատրիարքությանը, ապա այն, ըստ Մինասյանի, պետք է մասնակցի պատարագին, քանի որ ստիպված է գործել Թուրքիայի օրենսդրության դաշտում: «Եթե պատրիարքությունը ծայրահեղ քայլերի դիմի, ապա գուցե հաջորդ անգամ ընդհանրապես որեւէ միջոցառում իրականացնելու իրավունքից զրկվի»,-նշեց նա:
Մկրտիչ Մինասյանն ասաց նաեւ, որ ինքը կմասնակցի պատարագին մի դեպքում, եթե մինչեւ պատարագի մատուցումը եկեղեցու գմբեթին տեղադրված լինի օրհնված խաչը: