Թուրքիայի վարչապետ Ռեջեփ Թայիփ Էրդողանը թուրքական ATV-ի եթերում հարցերին պատասխանելիս, անդրադարձել է ուղղափառ Սումելա վանքի բացմանը եւ Աղթամարի Սուրբ Խաչին։
Թուրքիայի վարչապետը նշել է, թե 8 տարի է Թուրքիայի ժողովրդավարության մեջ լուրջ զարգացումներ են տեղի ունենում՝ հիշեցնելով Սումելա վանքում եւ Աղթամարի Ս. Խաչում կրոնական արարողությունների անցկացման թույլատվությունները։ «Սումելայի վանքի պատարագը շատ արձագանքներ առաջ բերեց։ Թող տարին մեկ անգամ գան եւ պատարագ իրականացնեն։ Նույն բանը արեցինք Վանի Աղթամարի եկեղեցու հետ կապված։ Աղթամարի Ս. Խաչի վերանորոգումը պետական գանձարանից է արվել։ Դեռ ավելի լավ բաներ էլ են լինելու։ Մինչեւ երեկ տաբու համարվող որոշ բաներ կոտրելով գալիս ենք։ Եւ այդ ամենը անում ենք աշխարհի խաղաղության համար»-նշել է Թուրքիայի վարչապետը՝ մոռանալով նշել թուրքական իշխանությունների վերջին խայտառակ որոշումը՝ կապված Աղթամարի Ս. Խաչ եկեղեցում մինչեւ պատարագը խաչը անհիմն պատճառներով չտեղադրելու հետ։