Հայաստանում միջազգային ստանդարտներով կառուցվող Իրանից Վրաստան տանող մայրուղին կնպաստի իրանական արտադրանքը Սեւ ծով հասցնելուն: Այս մասին, այսօր՝ հունվարի 20-ին, Թեհրանում Իրանի տրանսպորտի եւ քաղաքաշինության նախարար Աբբաս Ախունդիի հետ հանդիպման ժամանակ նշել է ՀՀ տրանսպորտի եւ կապի նախարար Գագիկ Բեգլարյանը:
Տրանսպորտի նախարարությունից NEWS.am-ին հայտնում են, որ կողմերը քննարկել են Պարսից ծոց-Սեւ ծով միջանցքի ստեղծման վերաբերյալ հարցեր։ Մասնավորապես, բանակցություններ են ընթացել Ջուլֆա-Երասխ երկաթգծի կառուցման շուրջ:
Գագիկ Բեգլարյանը հանդիպումից հետո նշել է, որ հայ եւ իրանցի փորձագետների համագործակցության շնորհիվ այդ հարցում հնարավոր է դրական արդյունքներ գրանցել. «ՀՀ-ում կառուցում ենք միջազգային ստանդարտներին համապատասխանող Իրանից Վրաստան տանող մայրուղի: Հույս ունենք, որ մինչեւ 2018թ. շահագործման կհանձնենք Երեւան-Վրաստան հատվածը: Հայաստանի տարածքով երկու երկրների միջեւ ճանապարհային ապրանքափոխանակումների համար ստորագրելու ենք համաձայնագիր, ինչը կնպաստի իրանական արտադրանքը Սեւ ծով հասցնելուն»:
ԻԻՀ տրանսպորտի եւ քաղաքաշինության նախարարը նկատել է, որ նախորդ տարվա ընթացքում Իրանի ու Հայաստանի միջեւ բեռանփոխադրումների 50 տոկոս աճ է արձանագրվել: 10 հազար բեռնատարներ Իրանից ուղեւորվել են դեպի Հայաստան, եւ եւս 2 հազարը` հակառակ ուղղությամբ:
Երկու երկրների միջեւ երթեւեկը խթանելու նպատակով հավասարեցվել են գանձվող մաքսատուրքերը:
«Ջուլֆա-Երասխ երկաթգծի կառուցման կապակցությամբ Հայաստանի հետ բանակցություններ են տարվել եւ պետք է դրա ֆինանսավորման շուրջ համաձայնություն ձեռք բերել»,-ասել է Աբբաս Ախունդին:
Նախարարի այցն Իրան շարունակվում է:
