ԱԺ ՀՀԿ խմբակցության պատգամավոր Համլետ Հարությունյանը չի կարծում, որ ՀՅԴ-ի պահանջով Սերժ Սարգսյանը հետ կկանչի Հայաստանի ստորագրությունը հայ-թուրքական արձանագրություններից։
NEWS.am-ի հետ զրույցում նման կարծիք հայտնեց պատգամավորը` անդրադառնալով «Դաշնակցության»՝ իշխանության հետ կոալիցիա կազմելու այդ պահանջին, որը դեռեւս կատարված չէ։ Դաշնակցականները համարում են, որ դա կոալիցիա կազմելուց հետո մեկ տարվա ընթացքում տեղի կունենա։
«Դա երկրին է վերաբերում, ոչ թե այս կամ այն կուսակցությանը, չեմ կարծում, որ նախագահը առաջնորդվում է կուսակցության շահերով։ Նախագահը առաջնորդվում է պետության շահերով»,-ասաց ՀՀԿ-ական պատգամավորը։
Անդրադառնալով այս օրերին ՀՅԴ-ին ուղղված մեղադրանքներին ու քննադատություններին, Համլետ Հարությունյանն ասաց․ «Մեր ապագա պարտնյորների մասին որեւէ բան չեմ ուզում ասել, դա իրենց մարտավարությունն է, իրենք են որոշում իրենց քաղաքական քայլերը, դրա համար ես իրենց չեմ քննադատում»։
Իրենց երբեմնի խիստ քննադատ ԲՀԿ-ի հետ համագործակցության վերաբերյալ մեր զրուցակցի կանխատեսումն այսպիսին էր․ «Կարծում եմ՝ ԲՀԿ-ն էլ կմտնի, բայց ոչ մեծ դիմադրություններով։ Կոալիցիան չի ենթադրում ուլտիմատումներ, որովհետեւ եթե դրանով են առաջնորդվում, ապա դա կոալիցիան չի լինում։ Սովորաբար կոալիցիան կազմում են ընդհանուր համագործակցությունների շրջանակում»։