![](img/news/03/08/02/default.jpg)
Հայաստանի հանրապետական կուսակցությունը չի մասնակցի Աղթամար կղզու Սուրբ Խաչ եկեղեցու պատարագին։ Սեպտեմբերի 14-ին լրագրողների հետ հանդիպման ժամանակ հայտարարեց ՀՀԿ-ական պատգամավոր Հովհաննես Սահակյանը։ Պատգամավորը մյուս քաղաքական ուժերին եւս կոչ արեց չմասնակցել եկեղեցու բացման արարողությանը, հավելելով, սակայն, որ դա յուրաքանչյուրի անձնական գործն է։
Սահակյանի կարծիքով, Աղթամար կղզու Սուրբ Խաչ եկեղեցու պատարագը թուրքական իշխանությունների կողմից պատրաստված հերթական շոու է։ «Համաձայն մեր եկեղեցական օրենքների՝ անընդունելի է, որ պատարագ իրականացվի առանց եկեղեցու գմբեթին տեղադրված խաչի։ Սա մեկ անգամ եւս Հաստատում է, որ թուրքերի այս քայլը շոու է»։
Հարցին, թե որքանո՞վ էր ճիշտ, որ հայաստանյան քաղաքական ուժերը չարձագանքեցին Սուրբ Խաչի գմբեթին խաչ չտեղադրելու Թուրքիայի որոշմանը, Սահակյանը նշեց. «Եթե մենք քաղաքականացնեինք այս փաստը, Թուրքիան կհասներ իր նպատակին։ Հայկական կողմից հարցի քաղաքականացումը Թուրքիան կօգտագործեր իր շահերի համար»։
Նշենք, որ թուրքական իշխանությունները հայտարարել են, որ տեխնիկական պատճառներով չեն հասցնում եկեղեցու գմբեթի խաչը տեղադրել մինչեւ սեպտեմբերի 19-ը եւ դա կանեն ավելի ուշ։