Գյումրիում տեղակայված 102-րդ ռուսական ռազմաբազա ծառայության են ուղարկվում զինծառայողներ, որոնք ռուսաստանյան զորամասերում ինչ-ինչ խնդիրներ են առաջացրել: Այս մասին NEWS.am-ի հետ զրույցում ասաց Ավետիսյանների սպանության գործով տուժողների իրավահաջորդների ներկայացուցիչ Լուսինե Սահակյանը՝ հետեւություններ անելով նախօրեին ռուս զինծառայող, գործով մեղադրյալ Վալերի Պերմյակովի վաշտի հրամանատար Արտյոմ Դանչինի՝ դատարանում տված ցուցմունքից:
«Ինձ համար ակնհայտ դարձավ, որ Հայաստանի զորամասը, ըստ էության, իրենց համար որպես աքսորավայր է ծառայում, որտեղ տեղափոխվում են ծառայողներ, ովքեր ռուսաստանյան զորամասերում ինչ-որ կերպ խնդիրներ են առաջացրել: Եւ այն, որ իրենք նշում են, թե լավագույն զինվորներին են ուղարկում Հայաստան, իրականությանը չի համապատասխանում»,-ասաց փաստաբանը:
Լուսինե Սահակյանի խոսքով՝ չնայած այն հանգամանքին, որ Դանչինը մասնակցություն չի ունեցել Պերմյակովին Չիտայից Հայաստան ծառայության ուղարկելու ստուգիչ աշխատանքներին, այնուամենայնիվ, հարցաքննության ընթացքում թվել է մի շարք չափորոշիչներ, որոնք պարտադիր են ռազմաբազայում ծառայության անցնելու համար:
Ըստ Դանչինի՝ ռազմաբազայում ծառայության չեն կարող անցնել հոգեբուժական հաստատություններում հաշվառված անձինք, նախկինում ձերբակալվածները կամ դատապարտվածները, նույնիսկ քրեական անցյալով հարազատներ ունեցողները, մինչդեռ Պերմյակովը հաշվառված է եղել հոգեբուժական հաստատությունում, իսկ նրա եղբայրը դատապարտված է եղել, բացի դա, Չիտայում ծառայության ընթացքում 8 անգամ դասալքություն է արել եւ երեք ամսով զրկված է եղել զենք կրելու իրավունքից:
«Դանչինի հարցաքննությունը կարեւոր էր նրանով, որ մանրամասն նկարագրեց, թե ինչ չափորոշիչներով են ընտրություն կատարում, ինչից պարզ դարձավ, որ Պերմյակովը որեւէ կերպ չի համապատասխանում այդ չափանիշներին, եւ պետք է Հայաստան չտեղափոխվեր, սակայն տեղափոխվել է»,-նշեց փաստաբանը:
Լուսինե Սահակյանի խոսքով, հետաքրքրական բացահայտում էր այն, որ Պերմյակովի դասալքության հետ կապ ունեցող բոլոր 6 ծառայողները հեռացվել են ռազմաբազայի անձնակազմից:
Փաստաբանի խոսքով՝ ռազմաբազայի վեց նախկին ծառայողները առանցքային վկաներից են, եւ անհրաժեշտ է պարզել վերջինների գտնվելու վայրը, եւ հարցաքննության նպատակով ապահովել նրանց ներկայությունը դատարանում:
«Մենք միջնորդելու ենք, որպեսզի նրանք հրավիրվեն դատարան եւ հարցաքննվեն, քանի որ այս գործով էական նշանակություն ունի նրանց ցուցմունքը: Այդ անձինք ինչ-որ առնչություն են ունեցել Պերմյակովին Հայաստան բերելու եւ նաեւ նրա ծառայությունը լքելու հետ կապված: Բացի այդ, պետք է պարզել՝ ինչպես է ստացվել, որ Պերմյակովի նման զինծառայող է ուղարկվել Հայաստան՝ հետագայում կանխելու նման դեպքերի կրկնություն»,-ասաց փաստաբանը:
Լուսինե Սահակյանը կարեւորեց նաեւ Ավետիսյանների հետ նույն բակում բնակվող նրանց ազգականուհու` Կարինե Ավետիսյանի՝ դատարանում տված ցուցմունքը, որը հակասել է նախաքննական ցուցմունքին:
«Նրա ցուցմունքով, համենայնդեպս, ակնհայտ երեւաց, որ որոշ տվյալներ նախաքննական մարմնին չէր հայտնել, մասնավորապես՝ չէր նշել, որ երեխայի ձայներ է լսել: Եւ լուրջ կասկած է հարուցում այն, թե նա, պատկից հարեւան լինելով, կրակոցների ձայներ կամ աղմուկ չի լսել: Երեւում է՝ որ ասածները չեն համապատասխանում իրականությանը»,-նշեց փաստաբանը:
Նշենք, որ բացի Դանչինից պետք է հարցաքննվեին ռազմաբազայում ծառայող եւս 6 վկաներ, սակայն ռազմաբազայից ուղարկված գրության մեջ նշվում էր, որ նրանք այլեւս ռազմաբազայի անձնակազմի անդամներ չեն:
Դատական հաջորդ նիստը կկայանա փետրվարի 5-ին, կշարունակվի վկաների հարցաքննությունը:
Նախորդ նիստի ժամանակ ամբաստանյալ Վալերի Պերմյակովն իրեն մեղավոր էր ճանաչել առաջադրված բոլոր մեղադրանքներում՝ առանձնակի դաժանությամբ իրականացված սպանության, ավազակության և Հայաստանի պետական սահմանը հատելու փորձի:
Նշենք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
Հայկական կողմը 2015թ. դեկտեմբերի 18-ից սկսել է դատաքննությունը: Նիստերը տեղի են ունենում ռուսական ռազմաբազայի տարածքում: Դատարանի վճռով նիստն ընթանալու է ուրբաթ օրերին: