Վիետնամից հետո ԵՏՄ-ն կարող է ազատ առեւտրի մասին պայմանագիր կնքել նաեւ Իսրայելի հետ։ Այս մասին փետրվարի 8-ին կայացած Մոսկվա-Աստանա-Երեւան մամուլի ասուլիսի ժամանակ ասել է Եվրասիական տնտեսական հանձնաժողովի ինտեգրացիայի եւ մակրոէկոնոմիկայի հիմնական ուղղություններով կոլեգիայի անդամ Տատյանա Վալովայան։Նա հույս է հայտնել, որ Վիետնամի հետ համաձայնագիրը շուտով ուժի մեջ կմտնի։
«Համար 2 հնարավոր թեկնածուն Իսրայելն է, քանի որ ուսումնասիրման փուլն ավարտվել է, եւ նախագահները որոշում են կայացրել, որ կարելի է սկսել բանակցությունները։ Ուսումնասիրվում է Եգիպտոսի եւ Հնդկաստանի հետ բանակցելու հարցը»,- ասել է նա։
Վալովայայի խոսքով՝ ազատ առեւտրի մասին համաձայնագրից բացի, կան նաեւ ոչ սակագնային միջոցների՝ ֆիտոսանիտարական, տեխնիկական եւ այլ հարցերով հուշագրեր կնքելու հնարավորություններ։ Դրանք արդեն ստորագրվել են Մոնղոլիայի, Չիլիի, Պերուի հետ։
Վերջապես ԵՏՄ-ն բանակցում է ոչ արտոնյալ բնույթի առեւտրա-տնտեսական հարաբերությունների հարցով։ 2015թ. մայիսին նախագահների մակարդակով որոշում է կայացվել նման համաձայնագրի հարց քննարկել Չինաստանի հետ, ուսումնասիրվում է նաեւ Կորեայի հետ բանակցելու տարբերակը։ Այստեղ հիմնական թիրախը Ասիա-խաղաղօվկիանոսյան համագործակցության երկրներն են։ «Վերոնշյալ 2 տիպի համաձայնությունները չեն փոխարինում ազատ առեւտրի մասին համաձայնագրին, սակայն շատ կարեւոր միջոց են լավագույնս համագործակցելու համար»,- եզրափակել է Վալովայան։
Նշենք, որ Իսրայելից Հայաստան ներմուծումը 2014թ. կազմել է 36.9 մլն դոլար։ Արտահանումն աճել է՝ 2 մլն դոլարից դառնալով 3.6 մլն դոլար։