Անգելա Մերկելը փորձում է չփչացնել հարաբերությունները Թուրքիայի նախագահ Ռեջեփ Թայյիփ Էրդողանի հետ, որովհետեւ նա Մերկելի «վերջին հույսն է», գրում է Deutsche Wirtschafts Nachrichten-ը:
«Մերկելի ամենամեծ ու հավանաբար վերջին հույսը, թե Եվրոպայում փախստականների ճգնաժամը կարելի է վերահսկողության տակ առնել, առանց սահմանները փակելու, հիմնված է թուրք առաջնորդի բարյացակամության վրա», — նշում է DWN-ը:
Հենց այդ պատճառով Թուրքիա իր վերջին այցի ընթացքում նա խոստացել է ՆԱՏՕ-ի ուժերը մոբիլիզացնել Էգեյան ծովում Սիրիայի հետ սահմանին Թուրքիայի ջրային տարածքը հսկելու համար: Դաշինքի նավերը կհետեւեն ներգաղթյալների տեղաշարժին եւ կզբաղվեն մաքսանենգության դեմ պայքարով:
«Խնդիրն այն է, որ ՆԱՏՕ-ն ռազմական դաշինք է, ոչ թե փրկության բանակ», — ընդգծում է DWN-ը:
Էրդողանն Արեւմուտքից պահանջում է աջակցել Սիրիայում Անկարայի գործողություններին, բայց նրան վատ խաղաթղթեր են բաժին հասել. ե՛ւ ԱՄՆ-ը, ե՛ւ Ռուսաստանը քրդերի կողմից են, որոնց Թուրքիայի նախագահը «ահաբեկիչներ» է անվանում: Բացի այդ, ՆԱՏՕ-ի գլխավոր քարտուղար Յենս Սթոլթենբերգն ավելի վաղ հասկացնել էր տվել, որ դաշինքը Սիրիայում ցամաքային գործողություններ չի նախատեսում:
Այդ պատճառով Մերկելը որոշել է հանգստացնել Էրդողանին այնպիսի անօգուտ, խորհրդանշական ժեստով, ինչպիսին Էգեյան ծովում պարեկությունն է, պարզաբանում է պարբերականը:
«Ռազմական առումով ՆԱՏՕ-ն չի աջակցի Էրդողանին: Սակայն եվրոպական քաղաքական գործիչներն ուզում են ամեն ինչ անել նրան չչարացնելու համար», — գրում է DWN-ը:
Այս շաբաթ ավելի վաղ Der Spiegel-ը, վկայակոչելով Անթալիայում բանակցությունների սղագրությունը, տեղեկացրել էր Եվրամիության հասցեին Էրդողանի սպառնալիքների մասին: Թուրքիայի նախագահը հայտնել էր, թե Եվրոպան կողողի փախստականներով, եթե Եվրամիության հետ կնքված գործարքի շրջանակում «ավելի շատ փող չստանա»:
Բացի այդ, Էրդողանը ԱՄՆ-ին հանդիմանել էր քրդերին աջակցելու համար` հայտնելով, որ ամերիկացիներն այդպիսով ահաբեկիչների են աջակցում եւ պատասխան են տալու տարածաշրջանում «արյան ծովի» համար, տեղեկացնում է «ՌԻԱ Նովոստին»:
