Գիտնական Մերի Սոմերվիլլը (1780-1872) թագավորական ընտանիքին չպատկանող առաջին կինը կդառնա, որի դիմանկարը կհայտնվի Շոտլանդիայի նոր` պոլիմերային նյութերից պատրաստված 10 փաունդանոց թղթադրամների վրա: Գիտության ժողովրդականացնողի եւ բազմագիտակի թեկնածության օգտին է արտահայտվել քվեարկությանը մասնակցած շոտլանդացիների մեծ մասը (4,1 հազար): Այդ մասին ասված է Շոտլանդիայի թագավորական բանկի (Royal Bank of Scotland, RBS) հաղորդագրության մեջ, որը Մեծ Բրիտանիայի հյուսիսային շրջանում հասարակական կարծիքի հարցում էր կազմակերպել: Տվյալ թղթադրամներն այնտեղ շրջանառության մեջ կդրվեն 2017-ի երկրորդ կեսին, տեղեկացնում է ՏԱՍՍ-ը:
«Մեր նոր 10 փաունդանոց «թղթադրամի» դեմքն ընտրելու հնարավորությունը մեծ նշանակություն ունի շատ մարդկանց համար, RBS-ի շոտլանդական բաժանմունքի ղեկավար Մալքոլմ Բյուքենենի խոսքերն է մեջբերում «Գարդիան» թերթը: Գիտության մեջ Մարի Սոմերվիլի հսկայական ներդրումը եւ ամեն ինչին հակառակ հաջողության հասնելու նրա վճռականությունն այսօր ավելի փոքր արձագանքի չեն արժանանում, քան նրա բեղմնավոր գործունեության տարիներին»:
Սոմերվիլի հետ բանկի շորթ-լիստում էին հայտնվել ինժեներ-շինարար եւ ճարտարապետ Թոմաս Թելֆորդը (1757-1834) եւ ֆիզիկոս, մաթեմատիկոս, մեխանիկ Ջեյմս Քլերկ Մաքսվելը (1831-1879): Հարցման նախաձեռնողների հայտարարության համաձայն, դա «արտացոլում է այն կարեւոր ներդրումը, որ Շոտլանդիան ունեցել է գիտության եւ նորարարական մշակումների ոլորտում»:
Նոր թղթադրամներ շրջանառության մեջ դնելու հնարավորություն ունեն Շոտլանդիայի, ինչպես նաեւ Հյուսիսային Իռլանդիայի իշխանությունները: Սակայն Բրիտանական կղզիների եւս մի տարածք` Ուելսն այժմ նման իրավունք չունի: