ՌԴ-ում 6 տարի 9 ամսվա ազատազրկման դատապարտված, հայ վարորդ Հրաչյա Հարությունյանն առողջական խնդիրներ ունի: Այս մասին NEWS.am-ի թղթակցին ասաց Հրաչյա Հարությունյանի դուստրը` Լիլիթ Հարությունյանը:
«Հայրս ողնաշարի ճողվածք ունի, եւ մենք մտավախություն ունենք, որ նա համապատասխան բուժօգնություն չի ստանա Ռուսաստանում: Այդ պատճառով շատ կցանկանանք, որ նրան արտահանձնելու գործընթացն արագացվի, որպեսզի նա տեղափոխվի Հայաստան եւ այստեղ բուժումը ստանա»,- ասաց Լիլիթ Հարությունյանը:
Արդարադատության նախարարության լրատվական ծառայությունից էլ Հարությունյանի առողջական վիճակի մասին հայտնեցին հետեւյալը. «ՀՀ արդարադատության նախարարությունը Հրաչյա Հարությունյանի հարազատների կողմից մինչ այս պահը դատապարտյալի առողջական վիճակի վերաբերյալ որևէ դիմում չի ստացել: Այդուհանդերձ, Արդարադատության նախարարությունն արդեն իսկ իր իրավասության շրջանակում ձեռնարկել է համապատասխան միջոցառումներ, հարցումներ ուղարկել իրավասու մարմիններին՝ խնդիրը պարզելու նպատակով: Արդյունքների մասին հավելյալ կտեղեկացնենք»:
Հիշեցնենք, որ բեռնատարը, որի ղեկին եղել է Հրաչյա Հարությունյանը, 2013 թվականի հուլիսի 13-ին մխրճվել էր Պոդոլսկից դեպի Կուրիլովո 64 ուղեւորի փոխադրող ավտոբուսի մեջ: Վթարի հետեւանքով 18 մարդ զոհվել էր, ավելի քան 40-ը՝ վիրավորվել:
Հետաքննության արդյունքում պարզվել էր, որ բեռնատարը հարկ եղածի պես չի սպասարկվել, ինչի հետեւանքով արգելակման հետ կապված խնդիրներ է ունեցել: Ըստ հետաքննության, Հարությունյանը պետք է իմանար այդ մասին:
Մոսկվայի քաղաքային դատարանը 2015թ. ապրիլին Հրաչյա Հարությունյանին դատապարտել է 6 տարի եւ 9 ամիս ժամկետով ազատազրկման: Մոսկվայի քաղաքային դատարանը անփոփոխ է թողել այդ դատավճիռը: