Գյումրիում 2015թ. հունվարի 12-ին Ավետիսյանների ընտանիքի սպանությունից հետո՝ ժամը 19:15-ին, Շիրակի մարզային ոստիկանություն է ահազանգել անհայտ քաղաքացի, հայտնել, որ որոնվող ռուս զինծառայողին մոտ մեկուկես ժամ առաջ տեսել է բանկում: Այս մասին այսօր՝ մարտի 11-ին, դատարանում հայտարարել է դատավոր Հարություն Մովսիսյանը՝ հրապարակելով գործին կից փաստաթղթերը: Նրա խոսքով, հունվարի 12-ին ժամը 10:11-ին Շիրակի մարզային վարչության ահազանգ է ստացվել այն մասին, որ անցել են ՌԴ զինծառայողի հետապնդման պլանին:
Ըստ մեկ այլ զեկուցագրի՝ նույն օրը 14:35-ին ոմն Գեւորգյան ահազանգել է, որ «Չուբազ» կոչվող բենզալցակայանի մոտ մի տղամարդու մոտ զենքի նմանվող առարկա կա:
Մյուս ահազանգը ստացվել է հունվարի 12-ին, ժամը 22:30-ին: Զանգահարել է Արման Անդրեյանը եւ հայտնել, որ հանցագործությունը կատարելու մեջ կասկածվող ՌԴ զինծառայողին տեսել է Պռոշյան գյուղում՝ ՊՆ շենքի մոտ, դեպի Աշտարակ տանող ճանապարհին:
Նշվել է, որ Ավետիսյանների սպանության մասին ահազանգն ստացվել է ժամը 12:25 րոպեին, հայտնել են, որ Մյասնիկյան փողոցի տներից մեկում հրազենային վնասվածքներով մահացածներ կան:
Այսօր նախատեսվում էր ռուսական ռազմաբազայի 7 նախկին աշխատակիցների հարցաքննությունը, սակայն ռուսական կողմը չի կարողացել ապահովել նրանց ներկայությունը: Այսպիսով՝ մեղադրող դատախազը դատարանին միջնորդեց փոխել ապացույցների հետազոտման կարգը եւ անցնել գործում եղած փաստաթղթերի հրապարակմանը: Միջնորդությունը բավարարվեց:
Հիշեցնենք, որ Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
Հայկական կողմը 2015թ. դեկտեմբերի 18-ից սկսել է դատաքննությունը: Նիստերը տեղի են ունենում ռուսական ռազմաբազայի տարածքում: Դատարանի վճռով նիստն ընթանալու է ուրբաթ օրերին:
Վալերի Պերմյակովն իրեն մեղավոր է ճանաչել առաջադրված բոլոր մեղադրանքներում՝ առանձնակի դաժանությամբ իրականացված սպանություն, ավազակություն եւ Հայաստանի պետական սահմանը հատելու փորձ:
