Պերմյակովը ինձ վրա 7 հոգու սպանել կարողացող մարդու տպավորություն չի թողել: Այս մասին, այսօր մարտի 17-ին, լրագրողների հետ զրույցում նշել է հոգեբան-փորձագետ Էլդա Գրինը, որը երկար զրուցել է Գյումրիում Ավետիսյանների 7 հոգանոց ընտանիքի սպանության մեջ մեղադրվող, ռուսական 102-րդ ռազմաբազայի զինծառայող Վալերի Պերմյակովի հետ:
«Երկար եմ զրուցել հետը, թաքնված մի բան կար: Մի նախադասություն ասաց, որն ինձ ցնցեց, ասաց՝ եթե ես նույնիսկ մենակ չլինեի, միեւնույն է, չէի ասի: Այդպիսի բան ասաց, բայց գուցե հենց այնպես էր ասել, դա իմ անձնական կարծիքն էր»,- ասաց փորձագետը:
«Պահվածքը մի քիչ բնորոշ չէր յոթ անձի սպանած մարդու: Տարօրինակ չէր պահվածքը, ուրախ էր ու շատ գոհ էր, որ հետը խոսում ենք: Հանգիստ ենք խոսել, մարդավարի ենք վարվել, թեստերը մեծ ուրախությամբ լրացնում էր: Անգամ մի քանի անգամ ասեցին՝ ճաշի ժամն է եկել, եթե ուշանաս, էլ ճաշ չի լինի, ինքը չէր ուզում գնալ, ուզում էր մնալ ու շփվել, գուցե կարոտ կար մարդկանց հետ շփվելու»,-ասաց փորձագետը:
Նրա խոսքով՝ Պերմյակովի հետ աշխատելիս, զգացել է նաեւ, որ երեխաներին է սիրել, նրանց նկատմամբ զզվանք չի տածել: Փորձագետին նաեւ անարժանահավատ է թվում Պերմյակովի՝ սատանիստ լինելու վարկածը:
Նշենք, որ ռուսական կողմի իրականացրած հոգեբուժական փորձաքննության արդյունքում Պերմյակովը հոգեպես առողջ էր ճանաչվել, թեեւ արձանագրվել էին որոշ շեղումներ:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով: