![](img/news/03/17/89/default.jpg)
Օրերս Սյունիքի մարզի Գորիս քաղաքում անցկացվեց «Կլիմայի փոփոխության հետեւանքների նկատմամբ Հայաստանի լեռնաանտառային էկոհամակարգերի հարմարվողականության բաձրացման մասին» երկօրյա սեմինար, որն իրականացվում է ՄԱԿ զարգացման ծրագրի(ՄԱԶԾ) եւ Գլոբալ էկոլոգիական ֆոնդի (ԳԷՖ) շրջանակներում։
Հայաստանի լեռնային անտառները, որոնք կազմում են հանրապետության անտառների 23 տոկոսը, առավել խոցելի են կլիմայի փոփոխությունների նկատմամբ, իսկ կլիման, ըստ վերջին 3 տասնամյակների հետազոտությունների, ավելի է տաքանում։ Լեռնային անտառների խոցելիությունը նվազեցնելու եւ կլիմայի փոփոխությունների նկատմամբ լեռնային էկոհամակարգերի հարմարվողականությունը բարձրացնելու համար ՄԱԿ -ի զարգացման ծրագրի եւ Գլոբալ Էկոլոգիական ֆոնդի ֆինանսավորման շրջանակներում Սյունիքի մարզի երեք քաղաքներում՝ Գորիսի, Կապանի եւ Մեղրիի անտառներում իրականացվել է ծառատնկումների պիլոտային ծրագիր:
«Քանի որ կլիման դառնալու է ավելի չոր, մենք նպատակ ունենք այնպիսի ծառատեսակներ ընտրել եւ տնկել, որ այդ պայմաններում կարողանան աճել»- նշեց ՄԱԶԾ/ ԳԷՖ ծրագրի տեղական փորձագետ Վլադիկ Մարտիրոսյանը՝ շարունակելով. «Ծառատունկ կատարված հատվածներն ընտրվել են հետեւյալ սկզբունքով. նախկինում այդ վայրերում եղել են հրդեհներ, այրվել է անտառը եւ մեկ ամբողջական անտառային զանգվածը բաժանվել է երկու զանգվածի»։ Նա նշեց, որ ընդհանուր հաշվով 70 հազար ծառ է տնկվել հրդեհված անտառների վայրերում։ Իսկ ծառերի կպչողականությունը, նրա գնահատմամբ, բավարար է եւ կազմում է 53 տոկոս։
«Առավել լավ են կպել հացենինները, իսկ խնձորենիներն առավել շատ են չորացել, եւ նպատակահարմար չէ այդ տարածքում խնձորենիներ տնկել։ Կաղնու ծառատեսակն էլ ավելի հարմար է ցանքսի միջոցով անել»-նշեց փորձագետը՝ հավելելով, որ լրացումներ կատարելիս նրանք առավելապես կտնկեն հացենիներ։
ՄԱԶԾ/ԳէՖ Ծրագրի առաջադրանքի ղեկավար Արամ Տեր-Զաքարյանն էլ ասաց, որ թեեւ ծրագրի թիրախային մասը Սյունիքի մարզի լեռնային անտառներն են, բայց արդյունքները եւ փորձի փոխանակման տարածման համար միջոցառումները կկազմակերպվեն նաւե այլ մարզերի անտառտնտեսությունների համար։
Նշենք, որ ՄԱԿ-ն աշխարհի շուրջ 28 երկրներում իրականացնում է այսպիսի ծրագրեր, սակայն միայն Հայաստանում իրականացվող ծրագիրն է, որ վերաբերում է անտառներին։ Այս ծրագիրն սկսվել է 2009 թվականից եւ շարունակվելու է մինչեւ 2012 թվականը: