Երեւանի քաղաքապետարանի եւ իտալական «Սերենիսիմա Կոստրուցիոնի» ընկերության միջեւ ստորագրվել է Արգավանդ-Շիրակ ճանապարհահատվածի շինարարության պայմանագիրը, որն իրականացվելու է Երեւանի արեւմտյան շրջանցիկ ճանապարհի կառուցման ծրագրի շրջանակում:
Պայմանագիրը ստորագրել են Երեւանի քաղաքապետ Տարոն Մարգարյանը եւ հաղթող ճանաչված ընկերության նախագահ Ալբերտո Բրենտեգանին:
Առանձնակի կարեւորելով նոր ճանապարհի կառուցումը` քաղաքապետ Տարոն Մարգարյանն ընդգծել է, որ այն կարեւոր դերակատարում կունենա մայրաքաղաքի կենտրոնի բեռնաթափման հարցում:
«Սերենիսիմա Կոստրուցիոնի» ընկերության նախագահ Ալբերտո Բրենտեգանին, նշելով, որ առաջին անգամ են Երեւանում աշխատանքներ իրականացնելու, վստահեցրել է, որ կարվի ամեն ինչ, որպեսզի աշխատանքներն ավարտվեն սահմանված ժամկետներում եւ որակն էլ գոհացնի բոլորին:
Հարկ է նշել, որ շինարարական պայմանագրի աշխատանքները ներառում են Հրազդան գետի վրայով 257մ երկարությամբ նոր մետաղական կամրջի եւ մոտ 2,7 կմ երկարությամբ երկկողմանի երթեւեկությամբ նոր ճանապարհի կառուցում: Կամրջի տակ տեղադրվելու է ջրի եւ նավթայուղերի մշտական զատիչ՝ նավթայուղերի հոսքը դեպի գետ կանխելու համար: Նոր ճանապարհն ունենալու է մոտ 24 մ լայնությամբ երթեւեկելի հատված՝ 4-6 երթեւեկելի գոտիներով: Աշխատանքների տեւողությունը՝ 24 ամիս: Կառուցվող նոր ճանապարհահատվածում տեղադրվելու են միջազգային չափորոշիչներին համապատասխան լուսադիոդային (LED) լուսատուներ: