![](img/news/31/88/05/default.jpg)
Շիրակի մարզի ընդհանուր իրավասության դատարանում այսօր՝ մարտի 25-ին, հրապարակվել է Ավետիսյանների սպանության գործով ապրանքագիտական փորձաքննության եզրակացությունը:
Ապրանքագիտական եզրակացությունը նշանակվել էր՝ պարզելու համար, թե Ավետիսյանների սպանության մեջ մեղադրվող, ռուսական 102-րդ ռազմաբազայի զինծառայողի Վալերի Պերմյակովը նյութական ինչ վնաս էր հասցրել Ավետիսյաններին:
Ըստ եզրակացության՝ Պերմյակովը տնից վերցրել էր գլխարկ՝ 500 դրամարժողությամբ, սպորտային տաբատ՝ 1100, ճտքավոր կոշիկներ՝ 15 հազար դրամ, տղամարդու բաճկոն՝ 2 հազար դրամ: Նշենք, որ Պերմյակովին ձերբակալելուց հետո նրանից առգրավվել էին բջջային հեռախոսներ, որոնք ըստ փորձաքննության եզրակացության, պատկանում է Ավետիսյանների ընտանիքի անդամներին:
Գործով ապացույցների ուսումնասիրությունը շարունակվում է:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով: