Երուսաղեմի Տիրոջ գերեզմանի տաճարում մայիսին սկսվելու են վերականգնման աշխատանքները:
NEWS.am-ի թղթակցին Երուսաղեմի պատրիարքարանից հայտնեցին, որ հայ, հույն եւ կաթոլիկ եկեղեցիներն արդեն համաձայնության են եկել եւ Սուրբ Զատիկի տոնից 2 շաբաթ անց աշխատանքները կսկսվեն:
«Մայիսի 1-ին Երուսաղեմում նշելու ենք Զատիկը, որից 2-3 շաբաթ անց արդեն ռեստավրացիայի աշխատանքները կսկսենք: Աշխատանքները կատարելու է տեխնիկական բյուրոն, որի կազմում երեք եկեղեցիների ներկայացուցիչներ կան»,- հայտնեցին պատրիարքարանից:
Նախնական գնահատմամբ, ծախսվելու է 3 մլն եվրո. պատրիարքարաններից յուրաքանչյուրը 1 մլն եվրո կտրամադրի:
«Նախատեսվում է աշխատանքներն ավարտել 8-12 ամսվա ընթացքում: Այս ամիսներին գերեզմանը բաց է լինելու ուխտավորների համար»,- ասացին պատրիարքարանից:
Նշենք, որ մարտի 22-ին հայ, հույն եւ կաթոլիկ պատրիարքները Սուրբ Հարության տաճարի մեջ՝ Ս. Գերեզմանի առջեւ, ընթերցել են նորոգման վերաբերյալ ընդհանուր հայտարարությունը: Ներկա էր նաեւ մասնագիտական ուսումնասիրության խմբի ղեկավար Անտոնիա Մոլոպուլոն: