Լեռնային Ղարաբաղի հանրապետության իրավասու մարմինները ապացուցողական բազա նախապատրաստելու համար տվյալներ են հավաքում, որպեսզի ադրբեջանական զինվորականների հանցագործությունների կապակցությամբ դիմեն միջազգային կառույցներին: այս մասին NEWS.am –ի թղթակցի հետ զրույցում հայտնել է ԼՂՀ մարդու իրավունքների պաշտպան Յուրի Հայրապետյանը:
«ԼՂՀ մարդու իրավունքների պաշտպանը հիշեցրել է, որ արդեն քրեական գործ է հարուցվել ԼՂՀ ՔՕ 410 ( ագրեսիվ պատերազմ) եւ 416 ( զինված բախումների ժամանակ միջազգային հումանիտար իրավունքի նորմերի լուրջ խախտում) հոդվածների նշաններով: «Հավաքում ենք նյութեր Ժնեւյան հռչակագրերի ու միջազգային հումանիտար իրավունքի դրույթների բազմաթիվ խախտումների փաստերով»,- նշել է մարդու իրավունքների պաշտպանը: Նա հիշեցրել է, որ սանձարձակելով լայնածավալ ագրեսիա Լեռնային Ղարաբաղի դեմ՝ Ադրբեջանը չի սահմանափակվել ռազմական օբյեկտների վրա հարձակումով, այլ թիրախ է դարձրել խաղաղ բնակչությունը, գյուղերը, դպրոցները: «Դրա հետեւանքով քաղաքացիական բնակչության շրջանում կան սպանվածներ ու վիրավորներ, այդ թվում զոհվել է մի երեխա, երկու երեխա էլ վիրավորվել է: Սակայն ադրբեջանցի հանցագործները սպանություններով չեն սահմանափակվել: Կան փաստեր նրանց իրականացրած գազանությունների, սպանված հայերի մարմինների անդամահատման ու պղծման մասին: Պետք չէ մասնագետ լինել հասկանալու համար,որ խոսքը աղաղակող հանցագործության մասին է»,- հայտնել է Յուրի Հայրապետյանը:
Նրա խոսքով, ակնհայտ է, որ խոսքը քաղաքացիական բնակչության դեմ ուժի անհամաչափ կիրառման մասին է: «Մի բան է, երբ օրինակ պատահական փամփուշտ է դիպչում: Սակայն այս դեպքում ակնհայտ է, որ խաղաղ բնակիչների վրա հարձակումը ծրագրված էր»,- շեշտել է մարդու իրավունքների պաշտպանը: Նա նշել է, որ գործի բոլոր նյութերը հավաքելուց հետո կքննարկվեն հետագա գործողությունները: Հնարավոր է դիմեն Միջազգային քրեական դատարանին, տրիբունալի ստեղծում նախաձեռնեն: «Ամեն դեպքում պետք է հասնել նրան, որ այս հրեշավոր չարագործությունների հեղինակներն ու կատարողները քրեական պատասխանատվության ենթարկվեն»,- նշել է Յուրի Հայրապետյանը:
Ինչ վերաբերում է ՄԻԵԴ դիմելուն, ապա նա հիշեցրեց, որ ըստ գործող ընթացակարգի, քաղաքացիները պետք է իրենք դիմեն այդ կառույցին: ԼՂՀ մարդու իրավունքների պաշտպանն նշեց, որ ինքը պատրաստ է քաղաքացիներին անհրաժեշտ իրավական աջակցություն ցուցաբերել:
