Թուրքիան աշխարհի եւ Եվրոպայի աչքերին «թոզ փչելու» քաղաքականություն է վարում։ Սեպտեմբերի 25-ին լրագրողների հետ հանդիպման ժամանակ նման տեսակետ հայտնեց ԵՊՀ պատմության ֆակուլտետի դեկան Էդիկ Մինասյանը՝ անդրադառնալով Թուրքիայում գտնվող հայկական եկեղեցիների վերանորգման թեմային։
Նրա համոզմամբ, Թուրքիայի «բարյացակամության» նպատակը մեկն է՝ ցույց տալ աշխարհին, որ ինքը ժողովրդավար եւ քաղաքակիրթ երկիր է, պատրաստ Եվրամիության մուտք գործելուն։ «Այնինչ թուրքերը յուրացնում են հայկական մշակութային ժառանգությունը, հայկական եկեղեցիների հիմքերի վրա մզկիթներ կառուցում, դրանց պատերից ջնջում հայատառ գրությունները։ Մեր նախորդ այցելության ժամանակ տեսել էինք եկեղեցիներ, որոնք բավական լավ վիճակում էին, իսկ այս անգամ դրանք գտանք առանց գմբեթի եւ ավերված»,- Արեւմտյան Հայաստան կատարած այցի մասին պատմեց Էդիկ Մինասյանը՝ որպես օրինակ բերելով Մշո Սուրբ Կարապետի վիճակը, որը մասամբ որպես ախոռ է օգտագործվում։