New York Times-ի արտասահմանյան թղթակից Ռուկմինի Կալիմակին այսօր՝ ապրիլի 24-ին Երեւանում արժանացել է մրցանակի «Սկզբունքային լրագրության համար» անվանակարգում։
Մրցանակը սահմանել էր Լրագրողների միջազգային կենտրոնը (International Center for Journalism (ICFJ)՝ «Ավրորա» մրցանակի հետ համատեղ։
Կազմակերպության նախագահ Ջոյս Բարնաթանը մրցանակը հանձնեց New York Times-ի արտասահմանյան թղթակից Ռուկմինի Կալիմակիին։
«Սկզբունքային լրագրություն» նորաստեղծ մրցանակը ճանաչման է արժանացնում այն խիզախությունը, նվիրվածությունն ու ազդեցությունը, որը լրագրողը ցուցաբերում է թեժ եւ հումանիտար ճգնաժամային իրադրությունում գտնվող կետերից լրատվություն տրամադրելիս։ Մրցանակակիրը պետք է վտանգի մեջ գտնվող մարդկանց թշվառ կացությունը լուսաբանելու գործում բացառիկ խիզախություն ցուցաբերի:
Նշենք, որ Aurora Prize մրցանակաբաշխությունը ստեղծվել է, որպեսզի Ցեղասպանությունը վերապրած բոլոր հայերի անունից շնորհակալություն հայտնի փրկիչներին: Հարյուր տարի առաջ նրանց դրսեւորած քաջության հիշատակին մրցանակով պարգեւատրվելու են ժամանակակից հերոսները, որոնք վտանգում են իրենց կյանքը հանուն ուրիշների փրկության:
Մրցանակն այս տարի չորս հավակնորդներ ունի։ Նրանք են Մարգարեթ Բարանքիցեն, նյույորքցի բժիշկ Թոմ Քաթենան, Սեյդա Ղուլամ Ֆաթիման՝ Պակիստանից, եւ հոգեւորական Բերնարդ Քինվին՝ Կենտրոնաֆրիկյան Հանրապետությունից։
Հաղթողի անունը հայտնի կդառնա այսօր, իսկ մրցանակը կհանձնի Ընտրող հանձնաժողովի համանախագահ, հայտնի դերասան Ջորջ Քլունին, որը հենց այդ նպատակով ապրիլի 22-ին ժամանել է Հայաստան:
Նշենք, որ «Ավրորա» մրցանակը շնորհելով՝ 100 LIVES նախաձեռնությունը ճանաչման է արժանացնում մերօրյա հերոսներին, որոնք անձնվիրաբար օգնում են մարդկանց: Այն հիմնել են հայ գործարարներ Ռուբեն Վարդանյանը, Նուբար Աֆեյանն ու Կարնեգի կորպորացիայի նախագահ Վարդան Գրեգորյանը:
