Քննչական կոմիտեում շարունակվում է ապրիլի 25-ին Երեւանի Հալաբյան փողոցում թիվ 63 երթուղին սպասարկող ավտոբուսի պայթյունի դեպքով քննությունը:
«Քննությունը շարունակվում է, ու քննության շահերից ելնելով՝ պարբերաբար տեղեկատվություն կտրամադրենք: Հանրության տեղեկություն ստանալու իրավունքը հարգելով՝ տեղեկություն պարբերաբար կտրամադրվի՝ չվտանգելով քննության հետագա ընթացքը»,- NEWS.am-ի թղթակցին ասաց Քննչական կոմիտեի նախագահի խորհրդական Սոնա Տռուզյանը՝ պատասխանելով հարցին, թե պարզվել է արդեն, թե որոտեղից պայթյունի ենթադրյալ մեղավոր մոտ այդքան մեծ քանակության պայթուցիկ նյութ:
Հիշեցնենք, որ 2016թ. ապրիլի 25-ին Երեւանի Հալաբյան փողոցի թիվ 11 շենքի մոտ ավտոբուս էր պայթել: Կա 2 զոհ եւ 8 տուժած:
Նախնական տեղեկություններով, դեպքի վայրում հայտնաբերվել է բջջային հեռախոսային քարտ, որի բաժանորդի ինքնությունը պարզվել է: 55-ամյա Ռուբեն Բալյանը ՀՀ քաղաքացի է, նախկինում երկու անգամ դատված։ Նրա բնակության վայրում օրենքով սահմանված կարգով ապրիլի 26-ին իրականացված խուզարկությամբ հայտնաբերվել է «տրոտիլ» տեսակի պայթուցիկ նյութ, պայթուցիչ սարքեր (դետոնատոր) եւ տարբեր տեսակի էլեկտրասարքավորումներ։
«Տրոտիլ» տեսակի պայթուցիկ նյութի տարրեր, հետքեր հայտնաբերվել են նաեւ ավտոբուսի եւ դեպքի վայրի զննությամբ առգրավված փորձանմուշների վրա, ինչը հիմնավորվել է նշանակված փորձաքննության նախնական եզրակացությամբ:
Հարուցվել է քրեական գործ, նշանակվել են մի շարք փորձաքննություն: Կատարվումէ քննություն: