Հայաստանի կառավարության համար մեծ անակնկալ չի եղել 7 ամսվա կտրվածքով տնտեսության 18,5 տոկոսի անկումը, քանի որ այդ ցուցանիշները կանխատեսվում էին: Այսօր լրագրողների հետ հանդիպման ժամանակ նման տեսակետով հանդես եկավ ՀՀ Ֆինանսների նախարար Տիգրան Դավթյանը՝ հավելելով, որ դա պայմանավորված է գլոբալ ֆինանսատնտեսական ճգնաժամով: Նրա խոսքով, տնտեսությունում առկա իրավիճակին համարժեք են նաեւ բյուջեի կատարման ցուցանիշները, որոնք 7 ամսվա տվյալներով կազմել են 359 միլիարդ դրամ եկամուտներ եւ 426,5 միլիարդ ծախսեր: Բյուջեի ընթացիկ դեֆիցվիտը կազմել է 4,5 տոկոս: Տ. Դավթյանը կանխատեսեց, որ տարվա կտրվածքով այդ դեֆիցիտը չի գերազանցի ԱԺ կողմից հաստատված 7,5 տոկոսի սահմանագիծը եւ կլինի մոտ 6,5 տոկոս: Հաջորդ տարի արդեն բյուջեի դեֆիցիտը, ըստ նրա, կկազմի ՀՆԱ-ի 5-5,5 տոկոսը իսկ հետագա տարիներին հետզհետե կվերադառնա նախկին տարիների ցուցանիշին՝ հասնելով մինչեւ 3 տոկոսի:
Տ. Դավթյանը նշեց նաեւ, որ ՀՆԱ անկման ներկա 18,5 տոկոս ցուցանիշը պայմանավորված է նրանով, որ նախորդ տարի այս ժամանակահատվածում տնտեսությունը իր պիկին էր հասել եւ բնականաբար համեմատությունը պետք է նման բացասական արդյունք ցույց տար, իսկ ահա 4-րդ եռամսյակում այդ 18,5 տոկոսը իջնելու է եւ տարվա վերջում անկումն ավելի փոքր է լինելու: Նա խոստովանեց, որ դա պայմանավորած կլինի նրանով, որ 2008-ի հոկտեմբերից սկսած տնտեսության մեջ արդեն նկատելի էին բացասական միտումներ եւ եթե անգամ տնտեսության մեջ որեւէ բարելավում չնկատվի, միեւնույնն է, այդ անկման ցուցանիշը 18.5-ից ցածր կլինի:
Տ. Դավթյանը իր դրական սպասումները կապեց նաեւ նրա հետ, որ ողջ աշխարհում տնտեսության կայունացման միտումներ են նկատվում: «Դրանք միայն միտումներ են: Գլոբալ ճգնաժամի ավարտի վերաբերյալ ազդակներ կան ԱՄՆ-ում, եվրոպական երկրներում, մասնավորապես՝ Գերմանիայում, որոնք հետզհետե դուրս են գալիս ռեցեսիայից»,- ասաց նա՝ հավելելով, որ այդ ազդակները հասնելու են նաեւ Հայաստան: