Աշխարհն իզուր է տագնապում, քանի որ Իրանին մատակարարվող C-300 համալիրները զուտ պաշտպանական զենք են, դրանք արգելված չեն ՄԱԿ-ի Անվտանգության խորհրդի բանաձեւերով: Այս մասին ՌԻԱ Նովոստիին տված հարցազրույցում հայտարարել է Ռուսաստանի ԱԳ նախարար Սերգեյ Լավրովը:
Նա նաեւ նշել է, որ մատակարարումների համար որոշակի ժամանակ կպահանջվի: «Բաղադրիչների մատակարարումներն արդեն իրականացվում են եւ, հավանաբար, կավարտվեն այդ տարվա ընթացքում»,- հավելել է Լավրովը:
Ռուսաստանցի պաշտոնյայի խոսքով, այդ պայմանագրի իրականացման դադարեցման մասին Ռուսաստանը հայտարարեց որպես բարի կամքի դրսեւորում, որպեսզի դրական ուղղությամբ ազդի իրանական ղեկավարության վրա, եւ Թեհրանը փոխզիջման գնաց իրանական միջուկային ծրագրի շուրջ բանակցություններում:
«Այդ նպատակին հասանք, Իրանի հետ համապարփակ համաձայնագիր կնքվեց, որն արժանացավ ՄԱԿ-ի ԱԽ-ի հավանության: Երբ ԱՄՆ-ն չեղարկում է Իրանի դեմ միակողմանիորեն սահմանված պատժամիջոցները, բայց զուգահեռաբար անհանգստաում է, որ մենք չեղարկել ենք մեր սահմանափակող միջոցառումները եւ վերականգնում են այդ համալիրներ մատակարարումը, դա, ըստ էության, շատ ամերիկյան ձեւ է: Նրանք կարծում են, որ ինչը թույլատրելի է Յուպիտերին, մյուսները չպետք է ընկալեն որպես օրինակ: Բայց մենք մեր քաղաքականությունն ունենք, մեր գնահատականները, թե ում հետ եւ ինչպես պետք է համագործակցենք, բնականաբար, չխախտելով միջազգային իրավունքի նորմերը»,- ընդգծել է Լավրովը:
