«Ազգայնական շարժում» կուսակցության ղեկավար Դեւլեթ Բահչելիին եւ նրա կուսակցության 40 նահանգային կառույցների ղեկավարներին Անիի մայր տաճարում նամազ իրականացնելու թույլտվություն տալու փաստը ցույց է տալիս, թե ինչպիսի կոմպլեքսավորված քաղաքական վերնախավ ունի Թուրքիան: Այս մասին NEWS.am-ի թղթակցի հետ զրույցում ասաց թուրքագետ Վահրամ Տեր-Մաթեւոսյանը: «Տպավորություն է, Բահչելին վերադառնում է իր հայկական ակունքներին եւ որպես հայ ուզում է աղոթել Անիի մայր տաճարում»,-հեգնեց թուրքագետը, հավելելով, որ տեղի ունեցածը Թուրքիայի կողմից բեմադրված քաղաքական շոուի տարրերից մեկն է:

Հարցին, թե ի՞նչ հետեւանք կունենա նամազի թույլտվությունը հայ-թուրքական հարաբերությունների վրա, Տեր-Մաթեւոսյանը նշեց՝ «Ոչ մի հետեւանք: Ընդամենը Հայաստանը պետք է Թուրքիայի հետ երկխոսության ժամանակ խնդիր բարձրացնի եւ ասի, որ եթե ձերոնց թույլ եք տալիս աղոթք անել, մերոնց էլ թույլ տվեք»:     

Նշենք, որ նամազը տեղի է ունենալու վաղը՝ հոկտեմբերի 1-ին:

Հիշեցնենք, որ շատ մասնագետների կողմից Կովկասի ճարտարապետության զարդը համարվող Անիի մայր տաճարի շինարարությունն սկսվել է հայոց արքա Սմբատ 2-րդի օրօք՝ 989 թվականին եւ ավարտվել Գագիկ 1-ինի օրօք՝ նրա կնոջ՝ Կատրամիդե թագուհու օժանդակությամբ 1001 թվականին։ 

Անիի մայր տաճարի ճարտարապետն էր Տրդատը, ով նաեւ վերակառուցել էր Կոստանդնուպոլսի Ս. Սոֆիա տաճարի գմբեթը։