Անիի Մայր տաճարում նամազ թույլատրելու որոշումը շատ վատ մշակված եւ կոնկրետ լսարան չունեցող գործողությունների արդյունք է։ Հոկտեմբերի 1-ին տեղի ունեցած ասուլիսի ժամանակ նման տեսակետ հայտնեց Հայոց Ցեղասպանության թանգարան-ինստիտուտի տնօրեն Հայկ Դեմոյանը:
Նրա խոսքով, իրենց այս գործողությամբ, թուրքերը փորձում են ազգայնական կրքեր բորբոքել հայերի շրջանում։ «Անիի Մայր տաճարում նամազ կազմակերպելով՝ նրանք մեզ ուզում են ցույց տալ մեր անուժ լինելը։ «Ազգայնական շարժում» ընդդիմադիր կուսակցության նախագահ Դեւլեթ Բահչելին իր այս նախաձեռնությամբ փորձում է նվաստացնել հայ ինքնությունը, սակայն իրեն հարգող ամեն մի մահմեդականի համար պետք է որ վիրավորական լինի որպես անասնագոմ օգտագործվող շինությունում նամազ անելը, առ Ալլահ աղոթք ուղղելը։ Այնպես որ, սա, ըստ էության, չի կարելի դիտել որպես հայկական կողմին ուղղված վիրավորանք։ Իրականում թուրքական այս նախաձեռնությունը ի ցույց է դնում թուրքական պատմության խոցելիությունը։ Սա վկայությունն է նրա, որ թուրքական հասարակությունը հատվածայնացված է»,- կարծիք հայտնեց Դեմոյանը։
Նրա խոոսքով, քրիստոնեական տաճարում նամազ անցկացնելը հավասարապես անպատվաբեր է ինչպես հայերի, այնպես էլ քրիստոնյա Եվրոպայի համար։ «Սա լուրջ մարտահրավեր է եվրոպական մշակութային ժառանգությանը եւ հիշողությանը, սա ապտակ է եվրոպական քաղաքակրթությանը։ Հետեւաբար այս գործողությունն իր գնահատականը պետք է ստանա ոչ միայն Հայաստանի, այլ նաեւ Եվրոպայի կողմից։ Սա լուրջ մարտահրավեր էր Եվրոպա ձգտող Թուրքիային։ Իսկ թուրքական կառավարությունը, որ արտոնեց նամազը, հնարավորություններ չթողեց մշակույթն օգտագործել իբրեւ երկու ժողովուրդներին կամրջող ուժ»,- կարծիք հայտնեց Դեմոյանը։
Ամփոփելով՝ նա նկատեց. «Այսօրվա նամազի գործողությունն իր ամբողջության մեջ ի ցույց է դնում թուրքական ազգայնականության նողկալի եւ բարբարոս էությունը, նսեմացնում եւ վիրավորում է ցանկացած մահմեդականի հոգեւոր ապրումները եւ իսլամը»։
Նշենք, որ Թուրքիայի մշակույթի եւ տուրիզմի նախարարությունը որոշում է կայացրել թույլ տալ «Ազգայնական շարժում» կուսակցության ղեկավար Դեւլեթ Բահչելիին եւ նրա կուսակցության 40 նահանգային կառույցների ղեկավարներին հոկտեմբերի 1-ին, Անիի Մայր տաճարում ուրբաթօրյա նամազ իրականացնել: