Գյումրիում Ավետիսյանների սպանության գործով դատավարությանը լրացուցիչ վկա է հրավիրվել: Վկային հրավիրել են տուժած կողմի իրավահաջորդի ներկայացուցիչ Միհրան Պողոսյանի միջնորդությամբ:
Վկա Աշոտ Կարապետյանը հայտնել է, որ ամբաստանյալին ճանաչում է որպես զորամասի զինծառայողի, որտեղ ինքն է ծառայում: Սակայն վկայի եւ ամբաստանյալի միջեւ որեւէ հարաբերություն՝ բարեկամական կամ թշնամական, չի եղել:
Վկան, որ հիմա պահեստի գնդապետ է, մինչեւ հիմա աշխատում է ռուսական բազայում հրատարակվող թերթի պատասխանատու քարտուղար: Բանակում նա ծառայել է 33 տարի: Տուժած կողմի փաստաբանի խնդրանքով վկան պատմել է, թե ինչպես է ընթանում բազայի զինծառայողների կազմի համալրումը: Նրա խոսքով՝ զորամասը համալրվում է լավագույն ցուցանիշներ դրսեւորող զինվորներով: Չնայած թվարկած տվյալները անմիջականորեն չեն վերաբերում պահեստի գնդապետի պրոֆեսիոնալ գործունեությանը, նա տեղեկություններ է տրամադրել, որոնք հիմնված են իր բազմայմա փորձի վրա:
Ողբերգության գիշերը՝ մոտավորապես ժամը 5-ին, նրան զանգահարել է զորամասի շտաբի պետը եւ հայտնել զինվորի անհետացման մասին: Խնդրել է հագնվել եւ սպասել հետագա հրամաններին: Երբ պարզ է դարձել, որ փշալարը կտրել են, իսկ զրահաբաճկոնը՝ նետել, վկային խնդրել են մեկնել ռազմական ոստիկանություն եւ հայտնել, որ զինվորը լքել է զորամասը՝ վերցնելով 60 փամփուշտով ինքնաձիգ: Վկան զանգահարել է ռազմական ոստիկանության հերթապահ մաս եւ հայտնել: Դրան ի պատասխան՝ ասել են, որ ռազմական ոստիկանությունը լիազորություններ եւ ռեսուրսներ չունի որոնումներ կազմակերպելու համար:
Դրա փոխարեն նրան խորհուրդ են տվել դիմել ոստիկանություն: Այդ ժամանակահատվածում նրան նորից զանգել է շտաբի պետը՝ հրամայելով ոստիկանների հետ գնալ հասցեներով, որոնք արձանագրվել են ծառայողական շան հետ որոնումների ժամանակ: Ավետիսյանների տունը դրանց թվում չի եղել: Վկան դիմել է ոստիկանություն եւ խնդրել համագործակցել օպերատիվ խմբի տեսքով: 4 ոստիկան, որոնցից երկուսը վերցրել են ինքնաձիգներ եւ զրահաբաճկոններ, մեքենայով մեկնել են Շիրակացի փողոց, ուր նրանց տարել է ծառայողական շունը: Ռուսական կողմի ներկայացուցիչները խնդրել են խոսել տան տիրոջ հետ եւ բացատրել, որ նրանք կասկածում են, որ այստեղ դասալիք զինվոր է թաքնվում: Համոզվելով, որ ոչ ոք չկա, ոստիկանները մեկնել են ծառայության վայր, իսկ վկան մեկնել է զորամաս դասալիքի որոնման պլան կազմելու համար:
Այնուհետեւ ինքը դա տարել է ոստիկանական բաժանմունքներ տարածման համար: Հետո վերադարձել է աշխատանքի: Կեսօրի մոտ հանցագործության մասին տեղեկություններ էին հայտնվել:
Երեկոյան, երբ Պերմյակովին բերում են զորամաս, վկան եղել է այնտեղ եւ հարցրել է, թե ինչու է նա դա արել: Ամբաստանյալն ասել է, որ չի պատկերացնում, որ նման բան է արել: Վկայի խոսքով՝ նա նաեւ տեսել է ՀՀ իրավապահ կառույցների ներկայացուցիչների: Սակայն նրանք քաղաքացիական հագուստով են եղել:
Աստիճանաբար վկայի հարցաքննությունը շեղվեց թեմայից, եւ ամբաստանյալի փաստաբանի նախաձեռնությամբ սկսվեց որոնող շան մասնագիտական հնարավորությունների քննարկումը: Փաստաբանին հետաքրքրում էր այն հարցը, թե ինչու շունը չի գտել Ավետիսյանների տան հետքը: Վկան հասկանալի պատճառներով չկարողացավ բավարարել փաստաբանի հետաքրքրասիրությունը: Շան ցեղատեսակներից վկան նույնպես առանձնապես գլուխ չէր հանում: Արդյունքում նա միայն կարողացավ հայտնել, որ շունը դեղին մորթի ուներ: