Անհրաժեշտ է հասնել Ադրբեջանի հայերի գույքային իրավունքների ճանաչմանը: Այդ մասին մայիսի 27-ին լրագրողների հետ հանդիպմանը հայտնել է «Մոդուս Վեվենդի» վերլուծական կենտրոնի ղեկավար Արա Պապյանը:
Ադրբեջանը, նրա խոսքով, մշտապես հայկական կողմին մեղադրում է իրենց գոյություն չունեցող հուշարձանների ոչնչացման համար: «Մենք պետք է բարձրացնենք Ադրբեջանի հայերի գույքային իրավունքների ճանաչման հարցը: Մյուս կողմից, մենք պետք է փաստեր բերենք, թե ինչու Ադրբեջանի հայերը չեն կարող վերադառնալ իրենց տներ: Եթե նրանք հանկարծ հայտնվեն այնտեղ, նրանց կսպանեն», - ընդգծել է Պապյանը: Երբ մենք խոսում ենք բանակցությունների մասին, շարունակել է նա, պետք է նկատի ունենանք ոչ միայն Լեռնային Ղարաբաղի հարցը: «Միջազգային հարաբերություններում հարցը գոյություն ունի միայն եթե այն բարձրացնում են եւ դժգոհություն են հայտնում», - նկատել է Արա Պապյանը: