Մենաշնորհն օրինականացնելը մենաշնորհի դեմ պայքարի ճանապարհ չէ: Այս մասին NEWS.am-ի հետ զրույցում ասաց ԱԺ սոցիալական հարցերի մշտական հանձնաժողովի նախագահ, ՀՀԿ-ական պատգամավոր Հակոբ Հակոբյանն` անդրադառնալով էկոնոմիկայի նախարար Արծվիկ Մինասյանի` մենաշնորհը օրինականացնելու հարցը քննարկելու առաջարկին:
«Դա ճանապարհ չէ, շուկայական տնտեսության մեջ հասարակ մատակարարումները չեն դարձնում մենաշնորհի առարկա, հակառակը` կարգավորում են, որ չլինի մենաշնորհ, իհարկե, ինձ համար անընդունելի է այդ տարբերակը»,-ասաց պատգամավորը:
Ավելի վաղ NEWS.am-ը հայտնել էր, որ նախօրեին ԱԺ-ում Էկոնոմիկայի նախարար Արծվիկ Մինասյանը, անդրադառնալով շաքարի մենաշնորհին, մասնավորապես, ասել էր. «Հայաստանի շաքար արտադրող գործարանն այսօր աշխատում է իր հզորության 25-30 տոկոսի չափով: Հիմա հարց է՝ առհասարակ այդ 25-30 տոկոսն էլ չպետք է թույլ տալ, որ աշխատի՞, թե՞ ավելի լավ է՝ դու օրենքով իրեն ճանաչես մենաշնորհ, բայց պայմաններ առաջադրես: Ընդունենք՝ ասես՝ դու պետք է առնվազն 90 տոկոս հզորությամբ աշխատես, դու պետք է ապահովես նվազագույնն այսքան աշխատատեղ, այսքան պետական բյուջեի մուտքեր, պետք է ապահովես թափանցիկություն: Այդ դեպքում, անկախ նրանից, թե ովքեր են սեփականատերերը, գուցե պետությունը նաեւ աջակցի այդ կազմակերպությանը՝ արտահանում կազմակերպի»:
